O confirma un nòu estudi publicat al jornal Frontiers in Immunology. Practicas de relaxacion coma lo iòga, lo tai chi o lo Qigong e la regulacion de l’alen relaxan l’èsser uman mas tanben provòcan de cambis en las reaccions mollecularas e arrèstan l’aparicion de malautiás coma lo càncer o la depression.
L’estudi es estat realizat per Ivana Buric e una còla de scientifics que confirman los efèctes positius que pòdon aver aquestas practicas de meditacion per rapòrt a l’estrès que patissèm los umans. Aital, quora una persona patís estrès lo sistèma nerviós simpatic comença a produsir una molecula aperada factor kappa B nuclear (NF-kB) que regula los gèns.
NF-kB transmet l’estrès en tot activar los gèns e los far produsir unas proteïnas nomentadas citoquinas, que son la causa principala de l’inflamacion a nivèl cellular. Un fach aqueste que se debana en reaccions cuertas per fugir mas que se demora per long temps pòt provocar desparièrs pertubacions psiquiatricas coma la depression o d’autras malautiás coma lo càncer.
Totun, las personas que realizan practicas de relaxacion del cos e mentalas patisson l’efècte contrari, çò es una reduccion en la produccion de l’NF-kB e la citoquina, en tot redusir l’inflamacion genetica e pr’aquò tanben una reduccion de divèrsas malautiás coma lo càncer, çò ditz l’estudi.
“L’inflamacion cellulara es una bona responsa del sistèma immunitari que, de segur, èra fòçra important pendent l’epòca preïstorica, quora los caçaires-culheires patissián un risc fòrça naut d’aver d’infeccions per las nafraduras – çò diguèron los autors de l’estudi -. Mas uèi lo jorn l’estrès es patit pendent long temps e l’inflamacion genetica pòt demorar tròp temps. Aquò es l’origina de divèrsas malautiás psiquiatricas e problèmas de santat en la societat actuala”.
Practicas que menan de beneficis
Segon Ivana Buric, de l’Universitat de Coventry (RU), los beneficis de las practicas de relaxacion uèi lo jorn son plan grandas. E o son pr’amor que lo benefici comença a nivèl molecular. Aquò pòt provocar, a l’encòp, un cambi al nòstre còdi genetic benfasent per la nòstra santat.
“Aqueste tipe de practicas de relaxacion, coma lo iòga o tai chi laissan una signatura moleculara en las nòstras cellulas – çò confirmèt Buric – que redusís l’estrès e l’ànsia en tot provocar una nòva manièra d’expression dels nostres gèns.
Dich d’un autre biais, aquò solament compòrta de beneficis per la santat umana. Maugrat aquò, los recercaires qu’an realizat aqueste estudi an reconegut que cal far mai d’estudis per ensajar de comprene melhor e amb mai prigondor cossí pòt ajudar a aqueste cambi far d’exercici o una bona nutricion. Aquò serián, segon aquestes scientifics, factors complementaris qu’ajudarián a provocar cambis genètics fòrça importants.
Mas la conclusion de l’estudi ja es considerada pro importanta per Buric e los sieus collègas e considerada coma lo primièr pas per començar una recèrca mai prigonda sus los beneficis que pòdon aver aquestas practicas en la santat. “aquò es lo començament d’una nòva edat per la santat umana– çò soslinhèt Buric-.”
La Redaccion
