Lo desèrt de Danakil es conegut per èsser un dels luòcs mai terribles de la planeta e qu’a, a l’encòp, una beutat de sciéncia ficcion. Situat al continent african entre Eritrèa, Etiopia e Jiboti, es un luòc ont la vida salvatja es gaireben inexistenta, la siá temperatura mejana es de las mai nautas de la planeta e los volcans de la zòna son dels mai actius del mond: Per aquò es conegut coma “l’infèrn sus la tèrra”.
Lo desèrt de Danakil es a la Banha d’Africa, a la depression d’Afar, a pas gaire distància de la mar roja e sus una fendascla de l’escòrça terrèstra que fa d’aquela longa plana plena de formacions de sofre, sulfats e sal un luòc ont la vida es gaireben impossibla e la convertís a l’encòp en un paratge ont se pòt veire qualqu’un dels païsatges mai incredibles.
Un d’aqueles luòcs que pòt èsser visitat dins aquela zòna es lo cratèr de Dallol, que ne parlarem mai endavant, e que poiriá plan remembrar las fonts termalas del parc de Yellowstone. Dins la zòna trobarem tanben lo volcan Erta Asle e lo volcan Dabbahu. La zòna del desèrt de Danakil es la depression de Danakil, ont las placas tectonicas africana e d’Aràbia se separan, e a la siá origina dins la Granda Val de la Rift. Aquela depression arriba als 100 mètres per jol nivèl de la mar.
Malgrat que se poiriá pensar que degun seriá tan ardit per viure sus aquel vertadièr infèrn terrenal, es lo luòc esculhit per aver la sieuna lar la tribú nomada dels Afar, amb una populacion de mai de 130 000 personas e que se consacran al comèrci de sal coma forma de vida. En aquela tribú, per desgràcia, las femnas son tractadas coma d’objèctes que trabalhan sens fin pel benestar dels òmes, e son emplegadas per tot, e son las darrièras a l’ora de manjar, e sonque çò daissan los òmes, e quand son malautas son daissadas morir sens cap d’ajuda medicala o dels autres.
Una tribú qu’es ailà fa 1000 ans
La tribú nomada dels Afar, es una etnia africana qu’abita dins la franja de desèrt de Danakil dempuèi fa mai de mil ans. Ocupan la franja de desèrt que s’estend tant dins la zòna orientala d’Etiopia coma d’Eritrèa e Jiboti, e son un pòble de pastors nomadas que comencèron a se convertir a l’islam amb lo contacte amb de comerçants. Son fòrça aisits de conéisser per sa manièra de vestir : la siá principala pèça de vestir es lo sanafil, una espècia de jupa que vària de color segon lo sèxe. A Etiopia son un milion e mièg de personas. Se consacran a l’ora d’ara principalament al negòci de la sal.
La depression d’Afar es la soma de tres placas tectonicas ont las crestas en estenduda que forman la mar Roja e lo gòlf d’Adèn montan sus la tèrra e se tròban dins la Granda Val de la Rift. En aquela region se tròba lo ponch mai bas de tota Africa, lo lac d’Assal, a 155 mètres jol nivèl de la mar. Es un dels ponches mai cauds de la planeta amb de temperaturas demest los 35 ° C pendent l’estacion de las pluèjas e los 60 ° C que s’arriban a aténher pendent la rèsta de l’an en çò que se considèra l’epòca shuta. La siá temperatura mejana es de 45 ° C, çò que lo convertís en lo luòc abitat pus caud del mond. Se pronostica que, en 10 milions d’ans, los fenomèns geologics acabaràn per far desaparéisser la Banha d’Africa. Lo fons de la depression d’Afar, ont se plaça lo lac Abbe, a una longitud totala de 3.500 km e es caracterizat per una grana activitat tectònica que partís en dos lo continent african.
Lo volcan Erta Ale, situat a la region de la depression d’Afar, es un volcan actiu dempuèi 1967, e se tròba ad al nòrd-oèst d’Etiopia e es considerat lo mai actiu d’aquel país. A una nautor de 613 mètres e es dels mai coneguts del desèrt de Danakil. Al sieu cràter i a totjorn un o dos lacs de lava que se desbòrdan en d’escasenças per la partida meridionala. Un dels faches que se pòdon destacar d’aquel volcan es qu’a un dels lacs de lava mai duradors de la planeta.
Dallol es un cratèr volcanic situat ala depression de Danakil, e se tròba a la part del desèrt de Danakil qu’aperten a Etiopia, al nòrd-oèst de las montanhas d’Erta Ale. Aquel airal se formèt a causa de la dintrada de magma basaltic als depauses de sal pendent lo Miocèn e l’activitat idrotermala posteriora. En epòca mai recenta, en 1926, e a causa d’erupcions freaticas, se formèt çò qu’es ara lo volcan de Dallol e a l’encòp tanben se creèron d’autres cratèrs que son a l’ora d’ara los respiradors volcanics sosterranhs mai basses de tota la planeta, aqueles qu’an de respiradors a 45 mètres jol nivèl de la mar. Lo volcan Dallol es un dels païsatges mai impressionants e inhòspits de tota la planeta, amb de fònts brutlantas e de colors brilhantas que van de l’iranja al verd, en passant pel blanc e lo jaune brilhant, a causa del sofre e d’autres minerals. Tot aquò convertís aquel luòc en lo luòc abitat amb lo recòrd pus caud de la planeta, ont las formacions geograficas fan semblar que visitèssem una planeta qu’es pas la nòstra.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
