La produccion mondiala de chocolat es menaçada per un virus. Lo cacau, ingredient de basa del chocolat, patís a l’ora d’ara una menaça plan grèva: lo Virus del Brot Confle. E ara una còla internacionala de cercaires assaja de comprene cossí va que lo cacau siá victima d’aquela malautiá e cossí se la pòt limitar.
Car aquel virus menaça lo cacau dempuèi de decennis e fa de decennis qu’ataca los cacauièrs africans. Lo Virus del Brot Confle ja foguèt identificat en Ghana en 1936 e la malautiá s’espandís lèu-lèu. I ajudan d’insèctes: quand aquestes son dins los arbres de cacau infectats, los pichons cacauièrs ja patisson lo virus.
L’infeccion pòt èsser descobèrta lèu pr’amor que las fuèlhas de l’arbre rogejan e se desforman, e lo brot se confla, dont lo nom del virus. La darrièra estapa de l’infeccion es la poiridura de la planta infectada.
Pas gaire de solucions encara
Pasmens, malgrat la sciéncia actuala, i a pas cap de remèdi per luchar contra la malautiá. Fins ara, ja son estadas temptadas divèrsas mesuras, dont la copa dels arbres infectats o la seleccion dels arbres mai resistents. Mas cap d’aquelas iniciativas a pas pogut salvar las plantacions de cacau.
Aquò a entraïnat fòrça pèrdas economicas en çò del cacau al nivèl mondial dempuèi de decennis. Sonque entre 1946 e 1948 mai de 254 milions de cacauièrs foguèron copats en Ghana. E uèi la malautiá contunha de s’espandir e de provocar de grandas pèrdas e l’economia africana, que pòt arribar al 50 % de la culhida.
Pr’amor d’aquò, la Còsta d’Evòri e Ghana recebèron mai de 600 milions de dolars de la Banca Africana pel Desvolopament. L’argent sonque foguèt destinat als païsans que subissián de pèrdas en causa del virus. Mas los cercaires vòlon comprene cossí e perqué la malautiá s’espandís tan lèu dins los cacauièrs del Mond.
Un recent estudi, publicat dins lo numeric Plos One, confirma que l’usatge de cèrtas socas pòt arrestar lo virus. Aquò fa infectar una soca de cacauièr per un tipe de virus plan mens agressiu. E los arbres pòdon aital venir mai resistents al virus real. Aquò provocariá una responsa immunitària dels cacauièrs e los poiriá salvar dins l’avenidor.
Mercés a aquela tecnica, los païsans africans devon aprene a plantar los arbres infectats amb un virus mens virulent se vòlon arrestar l’espandiment del virus. Fins ara, los assages son pas segurs ni mai definitius e cal emplegar de melhoras tecnicas. Mas, mentre que se fa aquò, lo prètz mondial del cacau es montat de mai del 140% en 2024.
E se lo virus pertòca, mai que mai, Africa, la produccion mondiala tanben es menaçada pr’amor de mai de 12 autras malautiás desparièras. Tanben son una grèva menaça per la culhida mondiala de cacau la pluèja e la secada, çò es lo cambiament climatic. En 2023, la produccion de chocolat en Ghana e Còsta d’Evòri ja demesiguèt fòrça. En 2022-2023, foguèt de solament 2,3 milions de tonas e en 2023-2024 de sonque 1,75 milion de tonas. Aquò a entraïnat en 2024 un prètz final del cacau ongan de mai del 140%, a respècte de 2023. E los expèrts avisan qu’aquel prètz encara poiriá créisser totjorn que mai se los virus e lo clima contunhan de destruire las culhidas de cacau dins lo Mond.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Imatge Principal: Yun Huang Yong
