UN NAU SÈGLE DAMB CAMBIAMENTS PRIGONDS
Maugrat que pendent era fin deth sègle XXau sonque i aueren bèri uns senhaus que confirmauen timidaments diuèrsi cambiaments sociaus, scientifics e politics, eth pas des annades demostrarie que, abans e tot, dera fin oficiau deth sègle XXau, ena planeta, ja començàuem a patir fòrça cambiaments en toti es nivèus, que soslinhauen qu’eth sègle XXIau auie començat, e qu’es cambiaments qu’era umanitat patirie serien fòrça prigonds en toti es nivèus; environamentau, medicau, energetic, politic, tecnologic e economic mès tanben sociau.
Çò qu’auètz entre es mans ei ua amassada d’articles dera revista en lengua d’òc Sapiéncia occitana (www.sapiencia.eu), publicadi, mès que mès, pendent era pandemia mondiau dera covid-19 des annades 2019, 2020 e 2021. Ère ua manèra de rebrembar as sòns legeires qu’es cambiaments deth nòste sègle son luenh d’èster petits e qu’es implicacions dirèctes e indirèctes patides per toti son granes. A toti es nivèus. Mès encara se consideram, com auem creigut nosati, qu’eth sègle XXIau ja neishec un shinhau abans, aperaquí 1996.
Es darrères 25 annades
Son donques 25 croniques sus es darrères 25 annades que demòstren que, eth mon on viuem, non a ja arren a veir damb era planeta que visquèrem es ciutadans deth sègle XXau. E que, dilhèu pr’açò, n’i a fòrça que non comprenem. E calie auer ua vision mès ampla sus com aguesti cambiaments provocaràn, e provòquen ja de hèt, era sensacion qu’èm ja en sègle XXIau, eth sègle deth futur. Que ja provoquèc fòrça cambiaments ena planeta (guèrres naues, ua exploracion espaciau mès decidida, importants descorbiments scientifics e tecnologics qu’impliquen, tanben, grani problèmes moraus, sobrepopulacion e mens recorsi naturaus e de matèries prumères, e crisis sociaus, de salut e economiques que deisharàn, ja abans de 2025, ua planeta que non ei bric semblanta ara deth sègle XXI.
Es articles sonque son ua mòstra d’aqueri cambiaments. Grani e prigonds. Vosati ne podetz pensar que tanben ne cau includir d’auti e dilhèu auratz arrason. Mès qu’era tòca non ère hèr un libe enciclopedic mès ua mòstra de çò que deu hèr eth jornalisme aué : ajudar tostemps a compréner eth mon que viuèm a trauèrs de hèts que pòden èster demostradi. Aumens, açò ei çò que mos digueren, ja hè fòrça annades, es nòsti mèstres dera universitat quan estudiauem jornalisme.
Christian Andreu, jornalista
Eth sègle XXIau ei des deth sòn començament un sègle damb grani cambiaments a toti es nivèus ; sociaus, economics, environamentaus, scientifics, politics… Entà descorbir aguesti cambiaments eth jornalista Christian Andreu, creador dera revista Sapiéncia Occitana, amassèc diuèrsi articles entà demostra’c.
E aciu avètz eth libre Croniques deth Sègle XXIau, que parle dera nòsta vida vidanta. Era vida de toti. Pr’amor qu’era istòria contemporanèa tanben ei era istòria de toti, de cadun de nosati.
PRÈTZ:10€ + DESPESES POSTAUS D’ENVIAMENT
TOTI ES SÒS SERÀN DESTINADI ENTARA EDICION D’AUTI LIBRES EN OCCITAN
