Dins lo Mond i a un pichonèl insècte que provòca la mòrt de mai de 725 000 umans de biais annadièr. Es l’animal pus dangeirós de la planeta en causa d’aquela chifra (la pus nauta de totas las mòrts provocadas per d’animals salvatges). E s’òm pensa que parlam de la làmia blanca o encara d’autres grands animals coneguts pel cinèma, sonque i aguèt 11 mòrts en 2021 de l’ataca de làmias sus tota la planeta. E segon l’Institut Australian de las Sciéncias Marinas, i a mai d’escasenças de morir d’un cocòt tombat sul cap que non pas per l’ataca d’una làmia.
Parlam d’un insècte tras que pichon: lo moissal, autrament dich mosquilh. Car pòt transmetre de malautiás coma la malària o la dengue e, segon l’OMS, mai de 725 000 umans morisson cada an en causa dels moissals.
Un insècte tras que dangeirós
Lo moissal pòt transmetre plusors malautiás, coma la del virus chikungunya, la dengue, la filariasi linfatica, la fèbre de la val del Rift, la fèbre jauna, la fèbre del virus zika, la malària, l’encefaliti japonesa e la fèbre del Nil occidental. I a tanben d’autres insèctes qu’o pòdon far, coma la nièra, lo pesolh o encara lo lagast, mas causan pas tantas mòrts.
Pasmens, i a de regions ont es pus perilhós. Los païses africans son los ont i a lo 96% d’aqueles decèsses (de la malària). Son de malautiás tropicalas e lo cambiament climatic ne provòca totjorn que mai. E arriban tanben de mai en mai en Euròpa. E, segon plusors estudis, lo sud del continent es l’endrech ont i aurà mai de moissals e tanben mai de mòrts en causa d’aquestes.
D’autre caire, d’autras bèstias egalament plan perilhosas pels umans son lo cagaròl d’aiga doça (200 000 mòrts cada an), la vipèra d’escata de ressèga (138 000 mòrts per an) o l’escorpion (2600 mòrts cada an). D’autres animals tanben plan dangeiroses pels umans son los crocodils marins (1000 mòrts annadièrs), los ipopotams (500 mòrts per an) e los elefants (500 mòrts per an). Malgrat totas aquelas chifras, nos podèm demandar se los quites umans son pas lo màger dangièr pels umans car, de segur, provòcan mai de mòrts que los quites moissals.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
