Home PALEONTOLOGIA LEI MOSASAURES AVIÁN DE SANG CAUD
LEI MOSASAURES AVIÁN DE SANG CAUD
0

LEI MOSASAURES AVIÁN DE SANG CAUD

0

Non es pas una nòva teoria scientifica per amòr que s’es pas encara pogut ren demostrar, mai la publicacion d’un escrich d’una còla de l’Universitat d’Arkansas sus leis autei possibilitats qu’aurián agudas lei mosasaures d’aver lo sang caud a dubèrt un autre còp lo debat dins la comunautat paleontologica. La discussion tòrna a èsser viva.

varner
Lei mosasaures doncas podián aver mai de temperatura intèrna maugrat la temperatura de l’environament.

Lei mosasaures siguèron un grop estench de reptils marins que visquèt pendent la fin dau Cretacèu. E segon aquesta nòva publicacion èran de creaturas dau sang caud. La sciéncia paleontologica a confirmat que s’estenguèron fa 66 milions d’ans, un pauc abans de l’extincion totala dei dinosaures. E una còla de scientifics prepausa qu’èran endotèrmes ò de sang cauda. La propòsta es estada presentada per Alberto Perez-Huerta amb l’ajuda de T. Lynn Harrell e Celina Suarez, e es estada publicada dins lo jornal Paleontology.

La causa n’es un autre escrich, publicat en 2010 que suggerissiá que lei mosasaures èran d’animals ectotèrmes ò de sang freja. Mai Perez-Huerta e sei collègas pensavan pas ansin. “Segon aquesta publicacion, çò diguèt Perez-Huerta , la termoregulacion en reptils marins coma d’ictiosaures, plesiosaures ò mosasaures èra pas de sang cauda. Aquò èra inquietant per amòr que sabèm totei que lei mesuras impòrtan en tèrmes de termoregulacion”.

Per realizar l’estudi, Perez-Huerta e Suarez faguèron una analisi de divèrs fossils de mosasaures de la colleccion que la ten lo Musèu d’Istòria Naturala de l’Universitat d’Alabama , una dei mai grandas de tota l’America dau Nòrd. Puei faguèron una comparason amb de fossils d’animals de sang freg, coma de tartugas e de peisses de l’epòca e tanben amb d’òs d’animaus de sang caud de uei o jorn, coma leis aucèus.

Una discussion sus l’endotermia

miller_mosasaur_jpg
Lei mosasaures siguèron un grop estench de reptils marins que visquèt pendent la fin dau Cretacèu. E èran de creaturas dau sang caud.

“Discutigueriam sus l’endotermia dei mosasaures amb tota l’informacion qu’aviam d’aquests reptils marins estenchs, çò confirmèt Perez-Huerta. E tot a travèrs de l’enòrma colleccion d’ossaments de mosasaures que ne dispausa l’Universitat d’Alabama. La conclusion es qu’aquestei creaturas èran de sang caud maugrat son genre ò son espècia, valent a dire qu’èran pas gigantotèrmes ni fòrça grands, mai que la temperatura intèrna èra independenta de lor talha”.

La propòsta scientifica d’aquesta còla suggerís donc que lei mosasaures podián aver mai de temperatura intèrna maugrat la temperatura de l’environament ont restavan e qu’aquesta èra encara mai auta qu’aquela deis aucèus, peis ò tartugas. Veirem ara quina es la reaccion de la comunautat scientifica lèu e s’aquò desboca sus una teoria scientifica de mai ò non. Pasmens, la propòsta es pron estonanta.

La Redaccion