![L’AGLA DE BONELLI](https://sapiencia.eu/wp-content/uploads/2022/07/AGLA-1.jpg)
L’agla de Bonelli , tanben coneguda coma Aquila fasciata (lo sieu nom scientific) pòt èsser l’agla la pus comuna del continent europèu e pr’amor d’açò òm pòt tanben la nomenar agla comuna. Òm pòt la trapar pertot al Mediterranèu e fins al sud d’Asia. Pasmens, ont n’i a mai encara es en de païses coma Occitània, lo Magrèb o la peninsula iberica. Per ansin, aquesta espècia d’ausèl accipitrifòrme aperten a la familha dels Accipitridae. Dins d’aquela familha d’ausèls de preda i a doas espècias reconegudas; las sosespècias d’Aquila fasciata fasciata e l’Aquila fasciata renschi.
![](https://sapiencia.eu/wp-content/uploads/2022/07/AGLA-2-300x200.jpg)
L’agla la pus comuna
L’agla comuna o agla de Bonelli (nomentada aital pr’amor del cercaire Bonelli) es un ausèl de preda que caça de biais jornalièr. Es grand e brave e los adultes pòdon arribar a far una envergadura alara entre 150 e 170 cm, del còp qu’una longor de fins a 70 centimètres e un pes d’entre 1,6 e 2,3 Kg.
Los especimèns adultes an una color pus clara que d’autras espècias d’agla; an l’esquina bruna clara e la part inferior de l’ausèl es blanca o jaune amb de regions un pauc mai escuras pertot.
La part superiora de l’agla comuna es bruna escura e an sovent una taca blanca a l’esquina. La coa es pus clara encara amb sonque una taca pus escura en la fin de la meteissa. De soslinhar que la diferéncia de colors, pus escurs e pus clars, es çò que permet identificar plan l’agla comuna.
Los especimèns joves an de colors tanben claras brunas e sonque la part superior de l’aucèl es un pauc mai escura. La coa es tanben brica escura e las alas pòdon arribar a semblar iranjas. La color d’adult arribarà pas fins al segond an amb mai de tacas escuras. L’agla de Bonelli o agla comuna es la pus agila de totas las grandas aglas europèas pr’amor qu’es la melhor caçaira. De conilhs, de perdius, de colombas e divèrsas espècias de reptil son preda aisida de l’agla comuna. La majoritat de las predas de l’agla de Bonelli son d’aucèl de mesura mejana e pichonèls mamifèrs a mai de lausèrts.
Es una agla tipica en d’airals coma Provença o la còsta de la region d’Occitània a mai de fòrça luòcs coma catalonha, lo País Valencian, e tanben mai al sud e dins la peninsula iberica. Al nòrd d’aquela, totun, ven de mai en mai rara. Son d’ausèls brica nomadas que migran sonque quand son pus joves e son plan territorialas. E pr’amor d’açò sonque fugisson de lor territòri se i a pas pus de noiridura per caçar.
Lo nombre d’aiglas de Bonelli es plan desconegut en Asia. En Occitània en 2002 i avián 41 parelhs e en la peninsula iberica òm pensa que i aurián 1.100 parelhs (aperaquí lo 75% de tota la populacion mondiala). Lo territòri per se reproduire déu èsser mai o mens naut amb fòrça ròcas malgrat que tanben pòdon bastir lo nis sus d’arbres coma d’eucaliptus. De còps, bastiguèron lo nis sus una tòrre d’electricitat.
![](https://sapiencia.eu/wp-content/uploads/2022/07/AGLA-3-300x200.jpg)
Per ansin, un parelh d’aglas comunas pòt bastir lo nis sus un bauç de mai de 100 mètres o tanben plan prèp del sòl se i a pro ròcas. Lo nis es totjorn bastit amb de brancas e èrba e pòt arribar als 2 mètres de diamètre.D’abituda arribaràn dos uòus de color blanca amb de tacas escuras e los pichons naisseràn aprés 40 jorns.
Ambedoas aglas suenharàn los joves al nis e 40 jorns aprés nàisser ja pòdon manjar solets e amb 65 jorns ja an un plomatge desvolopat per poder volar. Pasmens, encara demoraràn al nis amb los paires fins als 5 o 6 meses de vida e aprés començaràn a volar. Quand son joves pòdon s’aluenhar fins a 1.000 Km del nis e sonque tornaràn al sieu airal de naissença quand son ja adultes. L’electricitat, los caçaires, la pèrda d’abitat o mens de predas son de gigantassas menaças uèi lo jorn per l’agla comuna o de Bonelli.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion