ETH DINOSAURE MES GRAN DERA PLANETA

Es scientifics qu’an descorbit es uassi fossilizats d’ua naua espècia de dinosaure que semble qu’ei era mès gran dera Tèrra. Es uassi des pautes revèlen qu’er animau hège 65 tones e qu’encara creishie quan moric enes petites montanhes argentines hè 77 millions d’annades.

“ Tà poder compréner açò en perspectiva -didec eth paleontològ descorbidor deth dinosaure Kenneth Lacovara – cau díder qu’un elefant hè 5 tones, un diplodocus 18 e un Boeing 737 50 tones. E aguest dinosaure que hège 65 tones !”.

Atau que l’an aperat Dreadnoughtus schrani, que vò díder “que non a paur d’arren” com es vaishèths de guèrra de començament deth sègle XXau. Ère erbivòr mès peth sòn tamanh non auie cap de predator.

Dreadnoughtus auie un còth de 37 pès e pr’amor d’aquerò non se moiguie fòrça. Damb eth còth podie arribar a fòrça lòcs. Mès se tombasse, es sues costelhes non podien suportar tant de pes. Ath delà, minjaue totes es 24 ores deth dia e dera net e lèu non dromie.

Descorbiment

Era notícia a estat publicada aguest mes en Scientific Reports mès eth descorbiment siguec hèt en Argentina en 2005. Kenneth Lacovara, dera Universitat americana de Drextel, Pennsilvania, trapèc un femur, ua tíbia e un dotzenat de vertèbres. En totau, enquia 130 uassi que sigueren plan sauvadi en sabla. Açò hec qu’era descobèrta siguesse fantastica.

“Que’m pòdi imaginar es Dreadnoughtus damb eth madeish comportament que d’auti Titanosaures e, atau, amassar-se per centenats o milèrs de femelhes de 60 tones tà deishar es ueus en quauqua val perduda” diguec Lacovara.

S’an trobat eth 70 % des uassi d’aguest dinosaure e açò qu’ei un hèt excepcionau. Eth sòn descorbidor que ditz qu’aguesta creatura arribarà lèu a Hollywood coma minim en pròplèu documentau de dinosaures pr’amor qu’ei er animau mès gran dera planeta descobèrt enquia aué.

Christian Andreu