Es pas una badinada. E vòl pas èsser una ofensa. Es lo darrièr estudi publicat en la famosa revista Nature neuroscience en tot mostrar las conclusions d’un estudi fach per una còla scientifica internacionala. Après èsser prens lo cervèl de las femnas mòstra plan mens matèria grisa. Aquò seriá una defensa biologica de la maire per suenhar encara mai lo pichon.
Los escanèrs o an pogut confirmar. Après èsser prens, la matèria grisa del cervèl femenin – soslinhat en jaune e roge – mermariá en las divèrsas regions cerebralas de las femnas. Aquò mostrariá que en tot èsser prens la femna càmbia biologicament e neuronalament. Lo cambi fariá la maire mai responsable davant lo pichon. L’estudi s’es debanat pendent quatre annadas e las conclusions son estadas publicadas ara.
“Aqueste estudi, amassa amb d’autres, suggerís que la femna, en tot èsser prens, pòt arribar a patir cambis en lo sieu cervèl – çò diguèt Liisa Galea, de l’Universitat de Colómbia Britanica, en Canadà, e que foguèt pas en la còla qu’a fach l’estudi -. Aquestes cambis poirián èsser permanents en l’airal estudiat”.
L’estudi foguèt fach en tot estudiar amb d’escanèrs lo cervèl de 25 femnas que volián èsser prens. Dos meses après, la naissença foguèron somesas tornarmai a d’escanèrs e los resultats restacats amb los de 20 femnas qu’èran pas prens. De mai, foguèron comparadas amb 19 paires e 17 òmes qu’avián pas jamai agut cap filh. Los cambis mostrats per los escanèrs èran encara evidents dos ans après la naissença.
Un cambi neurologic visible
Totun, un cambi en lo cervèl pòt èsser restacat amb quicòm de marrit. Pr’aquò los scientifics o an volgut matisar. “las reduccions de matèria grisa al cervèl son pas de besonh una causa marrida – çò diguèt la coautora de l’estudi Elseline Hoekzema, de l’Universitat de Leiden, en Olanda-. Tanben se debana lo meteis pendent l’adolescéncia dels umans e pr’aquò pòt èsser considerat coma un segond estadi de l’evolucion personala cerebrala”.
D’autres experimentacions ja indicavan aqueste fach. Lo cervèl femenin càmbia d’una manièra fòrça singulara e aquò fa las femnas mai responsablas davant los pichons. Las regions que perdon mai activitat son los cortèx frontal e temporal e se pensa que son las restacadas amb la comprension de las perspectivas pas pròprias. Tot aquò ajudariá, dison los scientifics, a suenhar melhor lo pichon. Per contra, los paires mostrèron pas cambis en lors cervèls e aquò confirmariá que los cambis en las femnas an pas una origina sociala.
Pr’aquò ara pensan qu’aquestes cambis neurologics en lo cervèl femenin auriá coma origina cambis en los nivèls d’estrogèn e progesterona en las femnas. “Quan una femna es prens – çò diguèt John Russell, de l’Universitat d’Edimborg, patís una exposicion fòrça nauta a las ormonas al cervèl. Mas encara cal poder estudiar aquestes cambis fins la naissença del pichon. Sabèm pas encara quand se debanan aquestes cambis – contunhèt Russell – e poiriá èsser que pendent la naissença i aguèsse una casuda ormonal plan granda que placèsse lo cervèl en un reequilibri”. Un fach que la vòtz populara fasiá ja temps qu’aviá observat.
La Redaccion
