La teoria antropologica que ditz que l’intelligéncia umana ei atau pr’amor de la mesura deu noste cervèth qu’ei adara en question. Las mesuras que son importantas quiò, mes tanben lo besonh d’aver mei anar mei de sang qu’arriba au cervèth. Atau çò qu’afirma un navèth estudi hèit per las universitats d’Adelaide, en Australia, e Wittwatersrand, en Sudafrica.
L’estudi que confirmaré que lo cervèth uman e’s hasó mei gran mes qu’avó besonh de mei d’energia per mei de sang. Aquò, que voleré díser dilhèu ua necessitat mei grana d’aver mei de sang en lo regime alimentari.
Entà har l’estudi ua equipa scientifica d’aqueras universitats qu’ensagèn de calcular quant de sang averé cambiat en la soa arribada lo cervèth pendent la nosta evolucion. Qu’estudièn las duas honts que i a en la basa deu crani qui permeten a las artèrias d’arribar au cervèth.
Mei evolucion, mei de sang
La conclusion, publicada en lo jornau digitau Royal Society Journal Open Science que permetó aus cercaires de notar ua creishuda de l’evolucion umana segon la sang qu’arribava au cervèth. Mei d’evolucion, mei de sang “Las mesuras deu cervèth que creishón de 350% pendent l’evolucion umana – çò digó Emeritus Roger Seymour, cap de l’estudi – Que pensam qu’açò ei ligat au besonh uman de contentar las condicions energeticas per cellulas qu’i arribèn, pr’amor la quantitat de sang qu’arriba au cervèth que creishó de 600%”.
De mei, los scientifics que soslinhèn que la rason d’un cervèth com lo noste, qu’èra ligada a ua alimentacion mei grana d’oxigèn e de nutriment per la sang. Aquò vòu díser, entà mei d’intelligéncia que i a mei besonh d’i aver sang. Los horats per on passan las artèrias que’s hasón mei anar mei bèths dab l’evolucion.
Despuish que poden estudiar los cranis d’ancians davancèrs en Sudafrica, Edear Shelling, coautor de l’estudi, que podó ligar la mesura deu cervèth dab la d’aquestes dus horats. “Los dus horats per on passa la sang qu’evoluèn e que’s hasón mei bèths pendent los darrèrs 3 milions d’ans en tot evoluar d’Australopitèc dinc a la nosta espècia modèrna”.
Tot aquò que permetó, segon aqueths scientifics, d’avançar en las foncions cerebraus e tanben de desvolopar la filiacion dab los hilhs e tanben de desvolopar enqüèra mei la cooperacion familiau a la caça, entà deféner lo territòri o suenhar los petits. E tot aquò pr’amor qu’i avèva tostemps un besonh mei gran de sang.
La Redaccion
