ESPONGAS MARINAS; PRIMIÈRS ANIMALS TERRESTRES
Fasiá aviá fòrça temps que los scientifics volián saber qual èra estat lo primièr animal aparegut sus la superfícia de la Tèrra. S’èran faches d’estudis dempuèi las annadas 90 e ara una còla de l’Institut de Tecnologia de Massachussetts a pogut confirmar qual foguèt lo primièr animal viu sus la planeta e quand i demorèt.
L’estudi, qu’a coma cap David Gold, scientific d’aqueste institut , a pogut confirmar que los primièrs animals vius que demorèron sus la Tèrra foguèron las espongas e qu’aquestas demorèron, o melhor dich apareguèron, sus la planeta plan abans de l’explosion de vida animala que i aguèt al Cambrian. Aital, las espongas apareguèron en la Tèrra fa mai de 640 milions d’ans.
“Avèm pogut amassar d’evidéncias geneticas e paleontologicas que senhalan que las espongas foguèron la primièra forma animala mai anciana sus la Tèrra – çò confirmèt David Gold -. Coma que non se podiá determinar qual animal aviá viscut abans de l’explosion cambriana avèm fach un estudi a nivèl molecular per o d’trobar”.
Una idèa ja anciana
La comunautat scientifica ja fasiá temps que sospechava que i aviá agut d’animals abans de l’epòca cambriana. Entre aquestes benlèu espongas o algas. Mas avián pas trobat cap de pròva scientifica. Caliá far un estudi a nivèl molecular, çò qu’a fach la còla de David Gold, per confirmar s’aquò èra vertat o pas. Aquesta còla estudièt una molecula lipida tanben apelada esteròl, una version modificada del colesteròl, e ensajèt de la classar a l’epòca de la sieuna naissença.
Ja en 1994 s’èra dich que las espongas podián èsser los primièrs animals de la Tèrra e en 2009 se’n trobèron d’exemplars en Oman qu’èran tant ancians coma aquò. Mas caliá identificar quines animals avián aqueste gèn – esteròl- e quand foguèt desvolopat dins los organismes.
Après aver estudiat 30 organismes diferents coma de plantas, campairòls, algas e espongas de mar, la còla de David Gold poguèt, fin finala, confirmar quines èran los animals o organismes qu’avián l’esteròl e quines non.
La conclusion foguèt estonanta: èra parièr se èra manipulat lo temps dins l’arbre genealogic qu’avián fach. Las espongas marinas avián evolucionat – avián lo gèn de l’esteròl amb elas – fòrça abans que non las algas e pr’aquò se pòt dire que foguèron los primièrs animals que demorèron sus la Tèrra fa 640 milions d’ans.
Christian Andreu
