Ua bona notícia entar aranés. Es Paums an auut eth prumèr prèmi dera dusau edicion deth Prèmi ara Creacion de Contenguts Audiovisuaus en aranés. Era Associacion Es Paums de Vilamòs (Val d’Aran) qu’a estat premiada pera publicacion enes canaus sociaus d’òbres produsides entèrament en aranés. Era darrèra des sues produccions auec un gran recebement per part deth public. A estat era tetralogia ARTZ OS, qu’ei formada pes tèmes musicaus Genèsi, Mijaran, Beret e eth tèma principau Eth Balh der Os-Artz – que a nòm ara tetralogia e que s’a editat en sies lengues.
Ath delà, Es Paums an produsit d’auti videoclips e documentaus en aranés, coma per exemple Oxitònia, sus un poèma de Xavi Gutièrrez. Aguesta pèça siguec premiada damb es vòts deth public en Festivau Jean Verdier dera Cançon Occitana ena edicion deth 2021
Damb era letra de Jèp de Montoya
Tanben cau destacar eth videoclip Era Soca de Nadau e Net de Huec, toti damb letra deth poèta aranés Jèp de Montoya e musica deth compositor de Vilamòs Jaume Masana Castet. Eth metratge a estat filmat per Jose Bergés e es imatges aerianes an estat prenudes per Dani Castet de Pirineos Drone. En totes es filmacions es actors e actritzes an estat volontaris d’Es Paoesses e des pòbles dera Val.
Aguest prèmi dera Xarxa Vives represente un gran reconeishement tà Es Paums e les encoratge encara mès tà seguir trebalhant ena defensa dera lengua aranesa.Volem arregraïr as patrocinadors, Xarxa Vives, Omnium Culturau e eth GELA era sua sensibilitat damb eth prèmi as òbres araneses, que en aguesti moments an de besonh tota era ajuda possibla. Aguest premi siguec patrocinat pera Xarxa Vives d’Universitats, Omnium Culturau e eth GELA – Grop d’Estudi de Lengües Menaçades . Felicitats Es Paums !!!
