La secada que viu uèi lo jorn Iraq, tras que prigonda, es estada la causa principala de la descobèrta d’un palais e d’autras bastidas de çò que poiriá èsser l’empèri de Mitani (fa aperaquí 3.400 annadas). La tròba se passèt quand l’aiga del flume se retirèt pr’amor de la secada. Segon los cercaires los palais poiriá èsser lo de l’anciana vila de Mitani de Zakhiku, un important centre comercial d’aquel empèri qu’existiguèt entre los ans 1550 e 1350 aC.
“Iraq es un dels païses que mai patís lo cambiament climatic, çò afirmèt l’arqueològ Ivana Puljiz, de la còla de cercaires que comencèt a trabalhar sus lo palais e d’autras bastidas de Zakhiku, recentament descobèrts. E lo sud d’Iraq patís mai encara la secada”.
Segon los cercaires, la secada es tan prigonda en Iraq que calguèt balhar d’aiga de la Reserva de Mossul als abitants d’aquela region dempuèi desembre de 2021. E aquò menet a la retirada d’aiga e la descobèrta de çò que poiriá èsser una vila de l’Edat de Bronze que fariá decadas qu’èra jos l’aiga. La descobèrta del palais e las autras bastidas se debanèt a la vila de Kemune, al Curdistan.
Aquò auriá provocat lo començament del dessenh d’una mapa d’aquela vila pels arqueològs. En 2018 ja foguèt confirmada la preséncia d’un palais e puèi d’autras bastidas importantas. Segon la recerca dels arqueològs alemands de las universitats de Freiburg e Tübingen, tanben foguèron descobèrtas una fortalesa, de murs e torres e una bastida per la noiridura a mai d’un complèx industrial de la cultura de Mitani.
Una bastida amb de dieus
“Es una descobèrta tras qu’ordinària pr’amor qu’avèm trapat una granda quantitat de dieus que foguèron menats ailà dempuèi tota la region, çò diguèt Puljiz, E la recerca arqueologica es a mand de confirmar que lo luòc foguèt un centre comercial plan important per l’empèri de Mitani.
Aital, e segon aquela còla arqueologica, los murs del palais èra plan ben conservats e de còps avián plusors mètres de nautor, malgrat èsser estat fachs de fanga.“Aquò solament a coma rason que la vila foguèt destrusida per un tèrratrem aperaquí l’an 1350 abans lo Crist, çò apondèron los cercaires. E quand los murs tombèron o faguèron sus las bastidas. A mai tanben avèm trobat mai de 100 tauletas cuneiformas del periòde assirian miei e plan conservadas tanben”.
Pels arqueològs que trabalhan dempuèi fa d’annadas en aquela nòva vila de Mitani descobèrta pr’amor de la secada actuala, amb aquò òm poirà comprene melhor l’empèri de Mitani e la sieuna epòca a mai del començament de la dintrada en l’istòria d’Assiria en la region. La trobalha del palais e las tauletas plan conservadas foguèt considerat pels cercaires com un prètzfach qu’es gaireben un miracle.
La Redaccion
