Es plan sabut que los virus atacan las cellulas sanas, mas ara una còla scientifica a pogut crear un virus que solament ataca las cellulas cangerigènas a travèrs d’una ataca selectiva e pas las cellulas sanas. Amb aquò la luta contra lo càncer poiriá donar una passa de gigant.
La luta contra lo càncer provòca tanben efèctes secondaris pr’amor que, de còps, son atacadas e mòrtas las cellulas sanas e pas solament las cancerigènas. Ara un grop de recercaires de l’Institut d’Investigacions Biomedicas August Pi i Sunyer (Idibaps) e l’Institut d’Investigacion Biomedica (IRB) de Barcelona an creat un virus modificat geneticament que solament ataca las darrièras.
La creacion del nòu virus es estat confirmat en un estudi publicat al numeric Nature Communications e es estat dirigit per Cristina Fillat, cap del grop de Terapia Genetica e Càncer de l’Idibaps, e Raúl Méndez, scientific de l’IRB. Lo nòu virus es estat nomentat oncolitic e solament ataca las cellulas cancerigènas.
Aquò poiriá finir los tractaments de càncèr que provòcan atacas tanben a cellulas sanas. E cossí es estat fach ? En tot veire que las cellulas cancerigènas son plan semblablas a las sanas, los recercaires catalans an cercat la manièra d’infectar las cellulas cancerigènas amb un virus geneticament modificat. Lo nòu metòde es pro conclusent mas fins uèi lo jorn solament es estat provat en de mirgas.
Un virus modificat geneticament
En tot crear un adenovirus fòrça especial que solament ataquèsse cellulas cancerigènas los recercaires an pogut, fin finala, trobar çò que seriá una bona solucion en la luta contra lo càncer. Los virus, de mai, an unas caracteristicas fòrça bonas per poder èsser utilizats en la luta contra lo càncer.
Segon la còla qu’a fach l’estudi se pòt parlar un tractament qu’ataca las cellulas cancerigènas pr’amor qu’aquestas an caracteristicas morfologicas desparièras d’autras proteïnas e se pòt aital capitar en tot las atacar. “Avèm pogut determinar que i aviá un tipe de proteïnas apeladas CPEB – çò diguèt Raúl Méndez, scientific de l’IBR – que balhan informacion sus l’ARN uman . Quand patisson un desequilibri càmbian los gens e pòdon provocar càncer”.
Aital, e segon aqueste recercaire catalan, an profiechat qu’aqueste tipe de proteïnas mostravan un desequilibri per crear un virus modificat geneticament que solament ataca las cellulas qu’an un tipe de proteïnas naut e l’autre bas, çò es, las cellulas cancerigènas. Amb la vision qu’a lo virus solament pòdon èsser atacadas las cellulas pas sanas e pas las autras.
De mai, la còla qu’a creat aqueste virus an pogut “l’ensenhar” a atacar mai encara las cellulas cancerigènas e pas las autras. “En tot dintrar dins las cellulas cancerigènas, los virus modificats geneticament replicavan lor genòma. – çò diguèt Fillat, de l’Idibaps – Puèi après destrusir la cellula infectada, ne sortissián en tot liberar mai virus encara que’atacavan, a l’encòp, d’autras cellulas cancerigènas.
La Redaccion
