Ua còla scientifica internacionau a podut confirmar era edat de Posidonia oceanica: mes de 100.000 ans. Açò hè d’aguest organisme viu eth mes ancian dera Tèrra. Er estudi a balhat donades noves: pòt arribar a aver mes de 15 quilomètres d’extension e enquia 6000 tones metriques ena sua massa.
“Es organismes que clonen, coma era èrba maritima, mes coneguda scientificament coma Posidonia oceanica, an ua capacitat susprenenta de transmission des melhors gens –çò diguec Carlos Duarte, director der Institut Winthrop der Ocean , dera Universitat der Oèst d’Austràlia e qu’a hèt er estudi – E açò pòt passar pendent generacions”.
Era èrba maritima a ua reproduccion asexuau e aquerò vò díder que se genère a se madeisha en tot se clonar. Er estudi hèt a podut demostrar que Posidonia oceanica e tanben d’autes espècies d’èrba marina poden se reprodusir de manèra sexuau mes tanben asexuau. Aquerò permet era sua expansion lèu e aver es melhors gens pendent milièrs d’annades pr’amor dera sua clonacion. Totun, d’auti organismes vius pòden pas hèr açò pr’amor que solament se poden reprodusir de forma sexuau e pèrden gens en cada generacion.
Ua reproduccion unica
Er estudi qu’a hèt era còla de Duarte a trapat donades que poden obrir era pòrta a nòus estudis futurs sus aguest organisme. Era sua edat hè de Posidonia oceanica er organisme viu mes ancian dera Tèrra e açò ja ei ua beròia suspresa. “Cau compréner perquè aguesti gens s’an podut adaptar damb tan de succès ara vida maritima – çò diguec Duarte -. Es condicions environamentaus ena mar son fòrça desparières e era sua adaptacion pendent tant de temps ei un hèt estonant”.
De mes, es scientifics an trapat qu’era èrba marina ei eth prumèr des ecosistèmes de còstes marines dera planeta. E que ne son clau. Mes tanben an trapat ua donada negativa: an descreishut pendent es darrèrs 20 ans. E aué son en decadéncia en ua proporcion de -5% anuau.
“Perqué Posidonia oceanica a avut ua evolucion qu’a trionfat tant pendent milièrs d’ans e aué ei en decadéncia ? – se preguntèc Duarte – Dilhèu poden pas mes s’adaptar as condicions d’aué deth cambi environamentau”.
Er estudi s’a publicat en eth jornau PLos ONE e parle damb mes prigondor scientifica d’aguest genre d’organisme maritim, Posidonia oceanica, que solament pòt èster trapada en aigües maritimes mediterranèes – on ocupe mes de 3.500 quilomètres de terren- e australianes.
Christian Andreu
