Segontes un nòu estudi genetic fumar deishe traç en eth genòma uman en forma de metilacion der ADN – un procés en quau es molecules son somades a divèrses sequéncies der ADN – Er estudi es estat publicat en eth jornal numeric Circulation: Cardiovascular Genetics.
Maugrat qu’es mòrts per càncer de paumon an baishat pendent es darrèrs ans, fumar encara contunha d’èster ua des arrasons de mortalitat umana mes nautes de tota era planeta. Açò maugrat es campanhes hètes cada an e era accion legislatiua.
Dempús aver deishat de fumar, dècades dempús, er èster uman pòt contunhar de desvolopar divèrses malauties coma eth càncer o d’autes malauties croniques. Ara un nòu estudi soslinhe que fumar ocasione metilacion der ADN e aquerò pòt èster fatau pes malauties coronaries e paumonars.
Er estudi es estat hèt per ua equipa de scientifics der Institut Nacionau de Sciéncies dera Salut Environamentales. I an participat 16.000 persones desseparades en 16 grops. E s’a comparat er ADN des fumadors e des non fumadors.
Es conclusions confirmen qu’era metilacion der ADN demorarie restacada a mes de 7000 gens, çò ei a díder un tresau des gens umans -. Eth procés de metilacion der ADN solament torne a nivèus previs de non fumadors cinc ans dempús de deishar de fumar e pas abans.
Totun, divèrsi processi de metilacion der ADN encara son trapadi en divèrses persones enquia 30 ans dempús d’aver deishat de fumar. Era metilacion der ADN demore restacada a fumar e coma consequéncia ocasione divèrses malauties coma càncers e d’autes malauties cardiovasculars.
Ua passa mei ena luta contra eth càncer
“Es resultats son importants – çò diguec Stephanie London, cap der estudi – pr’amor qu’era metilacion ei un mecanisme dera regulacion dera expression genetica e a ua importància basica en eth desvolopament de malauties croniques”.
Era equipa qu’a realizat er estudi a volut en tot moment soslinhar qu’eth traç en er ADN uman contunhe ans dempús d’aver deishat de fumar. Un impacte genetic que pòt arribar enquias 30 ans. Totun, un còp s’a deishat de fumar era majoritat de persones a ua metilacion der ADN normau dempús cinc anades. Encara i a esperança.
La Redaccion
