L’Associacion d’Amics de la Sapiencia Occitana (AASOC) a acomplit cinc ans lo mes de junh d‘ongan. Mas aviá començat ja abans a publicar los sieus articles la nòstra revista numerica SAPIÉNCIA (2016). Un projècte començat per Christian Andreu, amb una tòca evidenta: la dignificacion de la lenga occitana coma instrument per transmetre de coneissença scientifica e umanistica.
Amb mai de dos mil articles publicats en las desparièras modalitats de l’occitan a la revista Sapiéncia, la publicacion del libre “Croniques deth Sègle XXIau” coma començament d’una sèria que rebatrà tanben la granda varietat dels nòstres interèsses, la creacion de la revista digitala Medievalòc especializada en tematica medievala, amb mai de 500 articles restacats a aquel periòde istoric, las collaboracions amb Ràdio País e la revista catalana El Món Medieval… podèm assegurar que lo projècte s’es consolidat.
Volèm mercejar als cronicaires e a totas las personas e institucions que nos an ajudat pendent totes aqueles ans, sustot pendent los moments mai malaisits. E a totes los nòstres legeires, que son vertadièrament lo motor del nòstre trabalh.
La nòstra tòca contunha encara mai viva, e las nòstras illusions son mai fòrtas, perque defendèm una lenga qu’es patrimòni dels occitans, mas tanben dels catalans e de tota Euròpa. Una lenga ligada a una civilizacion, l’occitana e un territòri. O per utilizar una paraula mai tipica, un paratge d’òmes e femnas liures, ont la cultura es l’ais que jonh e agrandís.
Pendent la prèpa sason 2023 – 2024 incorporarem de nòus projèctes e de nòvas collaboracions. Contunharem amb aquela granda aventura. Nos acompanhatz?
Francesc Sangar, president de l‘AASOC
