CAMIONS SENSE CAMIONÈRS
Es auanci tecnologics pendent es darrèrs tempsi son estonants. Diuèrses empreses ja an trabalhat ath long des darrères annades entà crear es nomentats camions autonòms (sense camionèr). Aué açò ja ei ua realitat pr’amor que tota ua flòta de camions autonòms començarà a circular en es carreteres d’Estats Units, creadi per TuSimple e crompadi peth gigant american Union Pacific. E açò comence ja aguesta madeisha primauera.
Atau, dempús de diuèrsi mesi entà desvolopar e sajar era conduccion d’aguesti tipe de camions, enguan començarà ja a circular era prumèra flòta de camions sense camionèr. Son camions creats pera empresa TuSimple mès que seràn ath servici deth gigant ferroviàri Union Pacific Railroad e amiaràn mercaderies entre es ciutats de Tucson e Phoenix, en estat d’Arizòna. Era sua arribada mèrque donques eth començament dera fin dera profession des camionèrs.
Un hèt tecnologic istoric
TuSimple comencèc a sajar aguesti tipe de camions en 2019, entà demostrar com podie èster amiar es mercaderies en carretera sense conductor. E pòc dempús arribèren es prumèrs exits de TuSimple. Cau rebrembar que TuSimple ei un gigant californian d’Estats Units associat damb eth hilat de pagesi e distribuidors mès grana d’aqueth país The Giumarra Companies. En 3 de mai d’aquera annada un camion autonòm cuelhec diuèrses tones de síndies en Nogales, Arizòna, e les amièc enquia Oklahoma City, en sonque 14 ores e 6 minutes. Un camionèr entà hèr açò a de besonh aperaquí 24 ores.
Mès encara calien camionèrs entà entrar e gésser des ciutats. En desembre de 2021 realizèren ua auta pròva e eth camion autonòm amièc es productes sense cap ajuda umana e eth viatge capitèc fòrça ben. Dempús i auec diuèrses pròves mès entà hèr 900 Km en tota sòrta de carreteres. Pr’açò comencèc era creacion dera prumèra flòta comerciau de camions autonòms dera istòria.
Entà 2023 TuSimple vò crear mès rotes de transpòrt en nomentat Triangle de Tèxas. Mès açò provocarà era fin dera profession de camionèr. Sense camionèrs era logistica mondiau que poirie cambiar ath 100% entà tostemps. Es camions autonòms son ua creacion tecnologica deth sègle XXIau revolucionària. Damb eri arribarà era fin des camionèrs mès tanben d’autes professions, pr’amor qu’eth taxi autonòm (e volador) tanben ei dejà ua realitat pr’amor que començaràn a circular ena ciutat de San Francisco, en Califòrnia, aguesta madeisha primauera (aguesti non vòlen, totun).
Dempús arribaràn es autobusi e trens autonòms, sense conductor, e açò tanben provocarà grani cambiaments sociaus, economics e culturaus ena nòsta societat que, pòc a pòc, dèishe d’èster semblanta ara deth sègle XXau.
Aguest cambiament radicau dera nòsta societat tanben poirie portar era arribada d’un pagament de sòs vitau as ciutadans de tota era planeta pr’amor que i aurà mès e mès persones sense trabalh. Cau rebrembar qu’era empresa Tesla ja anoncièc era arribada deth robòt mès modèrn dera istòria umana lèu lèu e que poirie èster crompat per toti entà trabalhar en es cases. Son donques cambiaments tecnologics revolucionàris e que son ja damb nosati entà tostemps.
Un article de Christian Andreu*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
