ACANTOSTEGA RESCRIU ERA ISTÒRIA NATURAU
Ja hè bèri ues annades qu’era istòria naturau ei en tot èster rescrita. Sens tantes donades coma d’autes epòques, eth Devonian (entre hè 419 e 359 milions d’ans ) mòstre ara ua pagina nòva que hè tornar a escríver era istòria evolutiva naturau. Era clau ei eth tetrapòde Acantostega.
Descobèrt ja en 1987 per ua esquipa scientifica en Groenlàndia, eth fossil d’Acantostega a estat analizat un aute còp damb es tecnologies mes nòves e a balhat donades fòrça interessantes. Ua d’eres ei qu’es esquelèts que s’avien trapat enquia aué son de joens e pas adulti. Eth nòu estudi ei publicat ena revista Nature per dues esquipes de recercaires dera Universitat sueca d’Uppsala e eth Mecanisme de Radiacion Sincotronic Europèu (ESFR).
Es fossils trapadi en Groenlàndia èren toti es uns sus es auti. Avien viscut en un petit arriu prèp d’un delta que demorèc sens aigua. E toti morigueren. Es esquipes qu’an hèt er estudi an decidit estudiar es òssi d’Acantostega e an pogut descobrir qu’èren toti animals qu’encara creishien.
Ua analisi mes prigonda
Era estructura microscopica des fossils d’Acantostega èren fòrça ben conservada. Avien tanben es cercles de creishement d’aguesti tetrapòdes. “Son coma es cercles de creishement des arbes – çò diguec Sophie Sanchez, cap der estudi -. Cada estacion ei ua marca deth creishement der animal en sòns òssi. E damb eri avèm podut saber qu’èren toti jovens, pas adulti”.
Ath delà, es “òssi” d’aguesti Acantostega non èren pas vertadièrs uassi mes cartilatges, çò que hè pensar qu’avien 6 o mens ans d’edat e qu’encara avien pas arribat ara maduritat sexuau. Atau. On son es adulti ? Vò díder aquerò qu’es joens d’Acantostega sigueren un des prumèrs animals aquatics en dintrar en tèrra pr’amor qu’era competéncia entre adulti los forcèc a ac hèr ?
Açò suggerís tanben dimorfisme sexuau, nòves estrategies adaptatives e ua competéncia òrre entre animals de desparières mesures. Ua nòva pagina dera istòria naturau poirie èster rescrita ena quau tetrapòdes coma Acantostega sagèren de conquistar era Tèrra solament per obligacion. Se demoraven en er aigua dilhèu non aurien sobreviscut. Un misteri mes qu’era Paleontologia aurà de resólver.
Era Redaccion
