CHINA CLONÈT (TORNARMAI ) DE CABRAS
Malgrat que, moralament, siá plan polemic pr’amor que son arribats d’o far amb d’èsser umans, los chineses an confimat ara qu’an tornat clonar d’animals, mai que mai de cabras tibetanas, amb un succès notable. Se confirma oficialament qu’a per origina de cercaires chineses qu’an tot lo sosten del govèrn chinés.
L’informacion es nòva mas tanben seguís los darrièrs decennis, pr’amor que divèrsas nacions an clonat d’animals –e de còps tanben d’umans -. Ara, pasmens, los scientifics chineses an anonciat qu’avián clonat de cabras tibetenas pel primièr còp. La resulta d’aquel clonatge tanben serà polemica perque los cercaires afirman qu’o an fach per preservar la raça de la cabra tibetana, plan menaçada uèi lo jorn.
Amb aquel clonatge, los chineses vòlon –o almens o pretendon oficialament– ajudar a preservar la diversitat genetica de fòrça espècias animalas dont las cabras tibetanas. Totun, lo clonatge d’animals contunha d’èsser plan polemic sus la planeta e cal remembrar qu’al nivèl internacional mai de 30 païses ja l’an enebit, mas demòra encara fòrça estats del Mond per o far (uèi, i a près de 200 estats sus la Tèrra).
La nòva es arribada de la man del jornal Xinhua, ont de cercaires chineses afirman que lo clonatge de cabras tibetanas en laboratòri es estat un grand succés e qu’aquò ajudariá plan l’environament, pr’amor que la tòca èra de cnsolidar la diversitat genetica de l’espècia.
Pasmens, cap de publicacion scientifica internacionala o anonciava pas, çò que fa sospechar, e fòrça, que lo biais d’o far e la resulta poirián èsser plan discutidas al nivèl internacional. Sonque los mèdias chineses n’an parlat mas cap de revista scientifica internacionala.
Un succès sonque chinés
Aital, los cercaires de l’Universitat Northwest A&F de China an afirmat que lo clonatge d’aquel tipe de cabra salvatge del Tibet èra un grand succés. Lo clonatge se tenguèt dins la província de Qinghai, una region vesina de Tibet. Su Jianmin, scientific en cap del programa de clonatge, a declarat a Xinhua que las cabras clonadas nasquèron en bona santat e que lo fach èra istoric dins l’istòria del clonatge animal.
Segon lo govèrn chinés, caliá clonar aquel tipe de cabra tibetana salvatja perque que balha la celèbra lana de Cashmir, qu’es la basa economica de la region. La tòca principala d’aqueste clonatge, doncas, delà l’ajuda desinteressada dels cercaires al mond animal, es sonque economic. Car lo govèrn chinés vòl melhorar l’adaptabilitat d’aquela lana en assajant de protegir la raça de cabas tibetanas contra la degenerescéncia (çò es la pèrda progressiva de las caracteristicas naturalas de la raça).
Mas s’encara demòra de poder veire quin es lo gra real de proteccion d’aquela raça en China, los cercaires chineses diguèron que lo clonatge èra estat totjorn fach per preservar la diversitat genetica de l’espècia e melhorar la siá adaptabilitat, un fach que benlèu a pas res a veire amb la preservacion naturala de l’espècia o la siá proteccion legala efectiva. Car la tòca del clonatge es pas res mai que produire de cabras mai fòrtas e aital poder garentir l’activitat economica agricòla de Qinghai.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
Fotografia principala: Ian Preston/CC
