De cercaires an recentament descobèrt un insècte que resistís melhor las atacas de los sieus enemics naturals amb una estonanta estrategia de medicacion. Es una mosca originària del Sud-Èst asiàtic, Drosophila suzukii, que s’es facha mai fòrta en tot metre las sieunas larvas dens entropina, una substància utilizada per las protegir dels parasits, lors enemics naturals.
La descobèrta es estada publicada al jornal Scientific Reports après qu’una còla scientifica del CNRS a decidit cercar cossí èra qu’aquesta mosca – apareguda a Euròpa fa solament dètz ans – èra arribada a èsser un flagèl per las fragas e las cerièras en divèrses païses d’aqueste continent e d’America. E aquò maugrat que l’utilisacion de vèspas parasitàrias contra Drosophila èra estat un dels metòdes de luta biologica mai utilisats per l’òme, que capitavan pas contre D. suzukii.
Aital, una collaboracion de cercaires del laboratòri biometric e biologic evolutiu de Villeurbane e l’Unitat d’Ecologia d’Amians volguèron descobrir perqué. La conclusion èra estonanta: las femnas de Drosophila suzukii meton los uèus en una planta qu’a un insecticida natural que protegís plan melhor las larvas dels parasits. Aquò seriá un dels primièrs cas de medicacion transgeneracionala d’un insècte conegut qu’explicarián la capitada de la conquista d’Euròpa d’aquesta espècia.
Una plaga òrre
Aqueste insècte es causa de preocupacion d’agricultors de fragas, cerièras e tanben rasim. Drosophila ataca las fruchas frescas en tot metre los uòus dins. Un còp nascudas, las larvas se desvolopan en tot minjar la frucha e aital fan pèrdre la valor comerciala d’aquesta. E fins uèi lo jorn los metòdes de luta biologica utilisats per l’èsser uman se son mostrats sens cap de valor. Mas perqué ?
Es çò qu’an volgut saber divèrses recercaires universitaris e que, amb l’ajuda del CNRS an trobat, fin finala, la causa. Drosophila suzukii met los uòus en las granas de belladona, una planta qu’a atropina, una susbtància toxica per los insèctes.
“Ja aviam detectat l’absorcion d’etanol en una autra espècia de drosophila – çò diguèt Emmanuel Desouhant –del Laboratòri de Biometria e Biologia Evolutiva de Villeurbane e coautora de l’article – e avián volgut descobrir se Drosophila suzukii utilizava tanben l’atropina per se defendre dels parasits”.
Lo mai estonant, es que D. suzukii bota pas totjorn sos uòus dins los fruchs toxics : sap quora fa besonh d’utilisar lo medicament, quora a vist un parasit abans de pondre, e quora fa pas besonh. En effècte, entropina es un medicament eficaç mas dangerós. Alora, aquesta capacitat d’adaptacion era una arma importanta per venir una espècia invasiva.
L’experimentacion se faguèt en tot metre larvas d’aquesta mosca en un luòc ric en atropina e d’autras larvas ont n’i aviás pas aquesta substància. E òc, èra estonant, mas vertat. Drosophila a aprés que metre las larvas en plantas amb atropina es un protector natural qu’arrèsta l’ataca de parasits, los sieus enemics naturals. “la taxa de subrevivéncia de las larvas es mai granda en preséncia d’atropina – çò confirmèt Patricia Gibert, coautora de l’estudi e directora del CNRS -. Aquò seriá confirmar l’existéncia de medicacion de generacion en generacion d’aquesta mosca e explicariá – tanben i a d’autres factors , totun – la sieuna capìtada en païses europèus dempuèi fa 10 ans”.
En realitat es pas lo primièr cas de medicacion transgeneracionala, domeni de recerca recent mas que foguèt ja observada en 2010 en co dels parpalhons monarcas. Totun, es la primièra fes qu’es utilisada per explicar l’invasion d’una espècia, e aquesta curiositat dubrís la via a d’aplicacions força esperadas dels nòstre païsans.
La Redaccion
