Moon Express que serà la purmèra enterpresa deu planeta tot d’aver l’autorizacion de viatjar tà la lua. Peu moment, qu’enviarà un robòt qui menarà materiau scientific e qui realizarà d’autas missions comerciaus, com portar cendres umanas tau satellit de la Tèrra. Lo robòt que’s harà lo purmèr viatge tà la lua en 2017.
L’autorizacion de viatjar tà la luna qu’estó balhada au començar deu mes d’agost. Qu’ei lo purmèr còp que lo govèrn estatsunian e autorizè ua enterpresa privada de viatjar tau satellit de la Tèrra. Qu’estó l’Administracion Federau d’Aviacion estatsuniana (FAA) qui ac autorizè. Dab aquera autorizacion qu’aprovè ua lei qui balharé probable l’escadença a d’autas enterpresas d’enterpréner lo medish viatge, o d’autes, com taus asteroïdes espaciaus o Març.
Lo començar d’ua navèra edat espaciau
Pr’amor d’aquò, lo fondator de l’enterpresa Moon Express que digó dejà que despuish aqueth dia, la lua que serà lo ueitau continent de la Tèrra. E segon l’autorizacion balhada per la FAA lo robòt qu’averà la talha d’ua valisa e qu’arribarà sus la lua entà’i deishar materiau scientific de tot ordi. En mei d’aquò, lo robòt que demorarà mei de duas setmanas suu satellit terrèstre entà’i deishar cendres umanas o realizar tot ordi de missions comerciaus.
Atau com ac confirmè Bob Richards, fondator de Moon Express, qui assegurè qu’aqueth viatge robotic qu’obrirà ua navèra edat scientifica, tecnologica e comerciau sus Tèrra. De mei, Naveen Jain, cofondator d’aquera enterpresa, que predigó que la lua e serà en 2017 ua part hèra importanta de l’economia terrèstra e que poderé vàder ua segonda residéncia peus umans.
La nau espaciau que miarà aqueth robòt sus la lua qu’enviarà tanben fòtos e videos a la Tèrra sus las soas operacions espaciaus, çò qui poderé estar lo començar d’ua andada comerciau d’enterpresas qui viajarén lèu tà la luna. Elon Musk, fondator d’ua auta enterpresa qui a la Luna com prètzhèit, Space Exploration Technologies, que confirmè dejà qu’aquera entrepresa e voleré enviar ua nau espaciau privada tà la Luna en 2018. Mes dejà las purmèras criticas scientificas que’s hèn enténer, pr’amor de la possibla contaminacion umana de la Luna, qui poderé estar infectada peus micròbis terrèstres.
La Redaccion
