L’arqueologia americana es urosa. Se son pas trobats de luòcs amb d’origina vikinga en aquel continent dempuèi 1960. Mas ara, en 2016, una còla arqueologica estatsunidenca, e amb l’utilizacion del satellit, a trobat un nòu luòc viking a Canadà, tanben a la còsta de Tèrra Nòva.
La còla es estada dirigida per Sarah H. Parcak, una arqueològa de l’Universitat estatsunidenca d’Alabama e lo sieu collèga Douglas Bolender, del Departament d’Antropologia de l’Universitat de Massachusets. Aquesta descobèrta seriá la mai granda de l’epòca vikinga jamai trobada en tèrras americanas dempuèi la descobèrta del vilatge viking de l’Anse-aux-Meadows en las annadas 1960. Lo nòuc luòc, apelat Point Rosee es a solament 480 quilomètres del primièr e seriá un luòc per rebastir o bastir batèls vikings en tèrras d’aqueste continent.
Las imatges captadas per satellit confirmèron primièr que i avián de centenats de luòcs possibles. Un estudi mai prigond laissèt aquesta recèrca en solament un luòc. E quora la còla arqueologica i arribèt per far l’excavacion trobèron divèrses espleches de fèrre viking e tanben divèrses murs de pèira fachs segon la tecnologia vikinga de l’epòca. Al delà d’aquò, los arqueològs an pogut confirmar que la sieuna origina es pas autoctona, çò es indigèna americana.
Un fum d’engenhs de fèrre
Maugrat que la comunautat scientifica a demandat de precaucion, diverses arqueològs de categoria ja an ditz que “la descobèrta es estonanta pr’amor que i aviá pas cap persona qu’o pensèsse”, çò diguèt William Fitzburg, del Musèu Natural d’Istòria de Washington. D’autres, coma Douglas Bolender, de l’Universitat de Massachusetts, an confirmat “que los objectes trobats son solament vikings pr’amor que i a pas cap d’evidéncia alternativa”. Segon el, aquel luòc seriá coma una sòrta d’usina per far d’armas e clavèls de batèl.
D’autres arqueològs tanben an ditz que la descobèrta es estonanta e que poiriá far pensar que, coma aquel luòc, tanben i aurián d’autres vilatges vikings en de tèrras americanas. “Es logic d’o pensar “, çò diguèt Gerald F. Bigelow, un arqueològ especialista en l’Atlantic Nòrd.
Totun, las pròvas encara an d’èsser mai conclusentas. En arqueologia lo contèxt o es tot. Fa temps foguèt trobada una moneda vikinga en Brooklin, Nòva York. Mas après se pensèt qu’èra arribada a travèrs del comèrçi e que i avián pas de pròvas de luòcs vikings en aquesta vila.
Mas la manièra cossí son estats bastits los murs e los espleches de fèrre trobats fan pensar l’arqueologia que benlèu cal far una relectura de l’istòria vikinga e medievala americana pr’amor que sembla que los vikings non sonque arribèron a America de manièra ocasionala mas que benlèu pensavan de la colonizar.
Christian Andreu
