Lo Primièr Meridian plaçat en l’Observatòri Real de Greenwich, en Anglatèrra, dempuèi 1884, s’es bolegat 102 mètres del sieu luòc d’origina istorica. Cossí es possible ? Una còla de scientifics de la Universitat de Virginia o an volgut estudiar.
Lo Meridian de Greenwich es un telescòpi dessenhat per l’astronòm Biddell Airy per l’observatòri d’aquesta vila en 1884. Amb aquel se pòdon veire d’estelas e tanben determinar l’ora locala. Foguèt plaçat en Greenwich per conselh de la Conferéncia Internacionala sus lo Meridian e dempuèi alavetz “es estat utilizat coma ponch zèro de la longitud mondiala”. Mas ara los scientifics confirman que s’es mogut.
Ja fasiá temps que los toristas qu’arribavan al Parc de Greenwich, ont es plaçat lo Meridian Zèro, avián de marchar 102 mètres mai enlà per lo visitar. La còla que o a estudiat arribèt a una conclusion estonanta. Quan foguèt plaçat, la sieuna ubicacion èra marrida.
Tecnologias mai modèrnas e mai eficaças
“Amb las nòvas tecnologias que avèm uèi –çò diguèt lo cap de la còla qu’a fach l’estudi, Ken Seidelmann, – tot es mai exacte. Avèm fach las mesuras amb GPS qu’utiliza de satellites fòrça mai exactes per determinar un ponch dins la superficia que non en 1884”.
L’estudi, que s’es publicat ala revista Journal of Geodesy, confirma qu’una defleccion en la direccion naturala de la gravetat a Greenwich es la causa responsabla. Mas que tanben o es estat contunhar d’aver lo meteis temps astronomic qu’en 1884. “Benlèu cal cambiar de manièra de mesurar lo temps”, çò dison los recercaires.
La disparitat se pòt atribuir a dos metòdes diferents de calcul de coordenadas: l’astronomic e lo geodetic. Aqueste fa referéncia a de ponchs determinats per trobar luòcs en la planeta. La desparietat es la “defleccion de la vertical”, un modèl global gravitacional que confirma la defleccion pr’amor que la Tèrra es pas 100 % ronda.
Las mesuras son estadas fachas amb una base sus aquesta vertical amb de mercuri. “Los GPS fan una linha que crotza lo centre de la planeta – çò diguèt Seidelmann – un fach que los scientifics de Greenwich de 1884 non podián ne somiar far”.
Christian Andreu
