T. REX NON SIGUEC UN DINOSAURE AMERICAN
Atau ac a confirmat un nou estudi hèt per scientifics americani e escocesi. S’enquia aué es paleontològs auien confirmat que Tyrannosaurus rex ère un dinosaure carnivòr originari d’America deth Nòrd, es naues donades diden qu’açò non ei vertat. Siguec ua espécia envasiua originaria d’Asia.
Eth carnivòr mès gran que jamès a demorat ena Tèrra, Tirannosaurus rex, poirie donques auer es sues origines en eth continent asian e auer arribat temps dempús a America deth Nòrd, on demorèc coma er arrei des carnívors e ajudèc ara extincion de fòrça autes espécies dera familha de tiranosaures que ja i demorauen hèia temps.
“Se pòt díder que Tiranosaurus rex siguec ua espécia migranta d’Asia – çò confirmèc un des cap d’aguest estudi, Steve Brusatte, paleontològ dera Universitat d’Edimborg -. Totun, que cau contunhar era recerca scientifica entà èster mès segurs”.
En eth nou estudi publicat ena revista Journal Scientific Reports, Brusatte e Thomas Carr, biològ deth Carthage College en Wisconsin, an analizat enquia 28 espécies de tiranosaures entà poder bastir eth sòn arbe genealògic. Enquia aué aguest ère fòrça desconeishut e pr’açò que, maugrat era fauta evidenta de trobalhes fossils, aguesti scientifics an podut identificar es prumèrs tiranosaures lonh d’America.
Quan solament i auie un continent
Hè mès de 200 milions d’annades, ena Tèrra i auie solament un supercontinent aperat Pangea, pendent eth Cretacèu. Es ancessors des tiranosaures i demorauen e pr’aquerò s’an trapat fòssils d’aguesta espécia en continents coma America deth Nòrd, Asia e Euròpa.
Damb eth temps, es tiranosaures evolucionèren en diuèrsi lòchs e açò vò díder qu’es tiranosaures asians èren desparièrs des americans. Mes hè 67 milions d’ans i auec un pont de terra entre Asia e America deth Nòrd e Tyrannosaurus rex crotzèc entà America. Totun, qu’es anàlisis confirmen qu’era sua esqueleta a ues origines asianes. En asia demorauen dus tiranosaures mès, Tarbosaurus e Zhuchengtyrannus.
“Tarbosaurus ei ua version asiana de Tyrannosaurus rex – confirmèc Brusatte a Live Science-. Mès tanben se poirie díder que T. Rex ei ua version americana de Tarbosaurus. Èren força semblants en mesures, dents e ossi deth cran. Zuchengtyrannus ère tanben parièr mès pas tan”.
Quan Tyrannosaurus rex arribèc en America hè 67 milions d’annades e enquia era sua extincion damb toti es autes dinosaures ena Tèrra hè 65 milions d’ans, siguec ua espécia envasiua en America. En aquera epòca i demorauen d’autes tiranosaures en er oèst nòrd american mès toti desapareishèren pendent era arribada de T. Rex.
“Non se sap segur coma siguec era extincion d’aguesti autes tiranosaures – çò confirmèren es scientifics qu’an hèt eth nou estudi -, mès se sap que T. Rex siguec ua peça importanta enes causes dera sua extincion pr’amor qu’ère ua espècie envasiua e arribèc a èster er arrei absolut sens nat competidor ena cadia alimentaria”.
Christian Andreu
