Lo govèrn mexican confirmèt la setmana passada que sonque demoravan aperaquí demest 6 e 8 “vaquitas” (Phocoena sinus) a la mar de Cortèz. De remembrar que l’espècia es considerada plan menaçada per la comunautat scientifica internacionala, que critiquèt mai d’un còp la passivitat del govèrn d’aquel país a l’ora de far quicòm per assajar de salvar l’espècia.
Aital, e segon lo darrièr estudi scientific realizat sus lo nombre d’especimèns que poirián encara demorar en aquela mar mexicana, aquesta espècia auriá redusit lo nombre d’individús tornarmai. Una autra possibilitat poiriá èsser que qualcunes especimèns se n’aguèssen anat de l’airal protegit ont deurián demorar. A mai d’aquò, ongan aguèron pas de pichons, una situacion pièger que la de 2023, quand nasquèron doas vaquitas.
L’estudi foguèt realizat al mes de mai e cobriguèt un airal màger de l’airal protegit de la vaquita al Gòlf de Califòrnia. Los promotors d’aquel estudi foguèron lo pròpri govèrn mexican e la Societat Conservadora de Pastors del Mar.
Una espècia en dangièr real d’extincion
La vaquita es una espècia mexicana plan menaçada. Los nombres totals de l’espècia venguèron plan mendres dempuèi la decada de 1990, quora encara n’i avián 600 especimèns. Uèi, en 2024, sonque ne demorarián 6 o 8. Las causa principala d’aquel declin son los pescadors de l’airal, pr’amor qu’usan de rets a la mar que provòcan la mòrt d’aquel marsoïn.
Totun, la situacion es venguda un escandal natural internacional pr’amor que lo meteis govèrn mexican declarèt ja en 2020 que luchariá contra la pesca illegala en aquel airal, e aital, balhariá un nòu espèr per la vaquita. Mas aprés, foguèt pas res fach jamai. L’esfòrç que ditz que faguèt lo govèrn mexican dempuèi 2020 es brica comprés per cap mexican nimai cap cercaire. Es verai que i aguèt una cèrta capitada a l’airal zero (ont es mai protegida l’espècia) mas aquò es un pichon airal que representa pas gaire per la subrevivéncia d’aquesta espècia a la region. La pesca illegala amb de rets contunha e lo govèrn mexican i faguèt pas res per la reduïre.
“Aquò es un senhal grèu de la situacion de la vaquita a Mèxic, çò diguèt D.J. Schubert, biològ del Programa Natural Marin de l’Institut de la Santat Animala. Lo govèrn capitèt brica a l’ora d’arrestar la pesca illegala a l’airal e se i a pas pus de vaquitas lo govèrn mexican se’n fòt”.
De remembrar que la vaquita patiguèt pendent decadas la pesca illegala amb de rets que provocavan dirèctament la sieuna mòrt. Totun, e malgrat que lo govèrn mexican enebiguèt en 2020 l’usatge, possession, transpòrt e creacion d’aquelas rets, encara son presentas uèi lo jorn en aquel airal del Gòlf de Califòrnia.
Cal saber que l’UICN e la Comission Internacionala de Caça de Balènas demanèt mai d’un còp al govèrn mexican d’arrestar aquela pesca illegala per salvar la vaquita. E ara demanan mai d’esfòrç se òm vòl pas veire la fin d’aquela espècia abans de 2030.
Fin finala, lo govèrn mexican confirmèt que realizarà un estudi en defòra de l’airal protegit d’aquela espècia per assajar de descobrir se i auriá qualcun especimèn e se aquò es aital ne comprene las causas.
La Redaccion
Fotografia principala : Semarnat/CC
