SE PÒT CREAR UNA ATMOSFÈRA PER UMANS EN MART
La composicion basica de l’atmosfèra de Mart, amb un 96% de dioxide de carbon, es un scenari ideal per crear una atmosfèra ont los umans pòdon viure amb l’ajuda de la descomposicion de plasmas. Aquesta seriá la posicion d’un grop de scientifics que defend l’utilizacion d’aquela tecnologia per crear un nòu mond en Mart.
Segon la còla scientifica qu’a estudiat aquel afar, la produccion locala d’oxigèn en la planeta roja poiriá ajudar e plan de solucionar la granda problematica que seriá balhar oxigèn a Mart. La despensa de combustible en naus espacialas que van e venon de la Tèrra per menar a Mart oxigèn es encara uèi un problèma de las grandas qu’arrèsta l’umanitat de viatjar a Mart per colonizar la planeta.
Mas, dison aquel grop de scientifics – qu’an publicat lor estudi al numeric Plasma Sources Science and Tecnology -, l’atmosfèra de Mart es facha en un 95,6% de CO2, argon (1,91%) e nitrogèn (1,9%) entre d’autres gases. E lo CO2 pòt èsser transformat a monoxid de carbon (CO).
“Cal enviar una mission tripulada a Mart. Aquò serà un pas de gigant en l’exploracion espaciala – çò diguèt Vasco Guerra, de l’Universitat de Lisbona -. La transformacion de CO2 amb de plasma es de mai en mai utilizada en la Tèrra. Utilizar aquela tecnologia solucionariá fòrça problèmas tanben aciu en la Tèrra pr’amor de la produccion qu’encara i a d’energia solara e lo cambi environamental”.
Una tecnologia de mai en mai utilizada
Aital, segon aqueles scientifics, la transformacion de CO2 amb l’ajuda de plasmas a pauca temperatura seriá un mejan ideal per cambiar l’atmosfèra actuala de Mart. Aquò se pòt far en tot descompausar lo CO2 a travèrs d’impactes d’electrons e en tot transferir aquela energia en excitacion vibracionala. E, dison, Mart a d’excellentas condicions per utilizar aquela tecnologia del plasma.
Aquò serià pr’amor que l’atmosfèra mai exteriora de Mart a una temperatura de -81 gras e aquò ajudariá de crear un efècte vibracional mai fòrt encara que non en la planeta blava. Tot aquò, confirmèron, seriá ajudat per la baissa temperatura de la planeta roja, que fariá mai lent lo procés e balhariá mai temps de la desseparacion moleculara.
“Es una tecnologia totalament ideala per de planetas amb una atmosfèra coma la qu’a Mart – çò afirmèt Guerra -. Poiriá crear una fònt d’oxigèn vertadièra e estable e, de mai, poiriá ajudar en la creacion de combustible pr’amor que lo CO ja es estat prepausat coma candidat en naus espacialas ibridas”.
Al delà, assegurèron, aquò ajudariá plan la logistica de las missions espacialas a Mart e redusiriá los còstes de las quitas missions. Una tecnologia que, de segur. Cal ara estudiar amb mai prigondor.
La Redaccion
