Una còla de scientifics cren aver trobat d’espròvas d’un univèrs parallèl. Aqueste es a costat del nòstre. Divèrsas senhals en la fin del nòstre univèrs serián la pròba de l’existéncia d’autres universes parallèls al nòstre. Aital se veriá confirmada la teoria del multivèrs.
Segon aquesta còla, lo sieu cap, lo doctor Ranga-Ram Chary, a estudiat los senhals residuals que i an al fons cosmic e las micro-ondas qu’auriá deissat lo Big Bang. En tot aquò auriá trobat divèrses ponchs luminoses que serián senhals scientifics d’un autre univèrs a costat del nòstre e plaçat aciu fa milions d’annadas. Pr’aquò Ranga-Ram Chary confirma que i a d’autres monds parallèls al nòstre. L’estudi s’a fach public en la revista Physical Review X.
Divèrses ponchs luminoses coma pròbas
Pel moment, aquesta seriá la conclusion provisionala d’aquesta còla scientifica. Confirmarián divèrsas teorias cosmologicas coma la que ditz que la collision d’universes alternatius poiriá èsser possible. Aital, los scientifics que cren qu’aquò es possible e afirman que los autres monds an una influéncia sus lo nostre pròpi univèrs pas petita. Aquò provocariá fenomèns que se pòdon pas explicar scientificament, coma lo movement de divèrsas particulas.
La teoria del multivèrs manten que lo nostre univèrs seriá una amassada de monds gigant e que divèrses d’aquestes serián semblants al nòstre e d’autres serián plan desparièrs. Totes aquestes monds existirián al còp e aurián influéncia los uns sus los autres a travèrs de la fòrça de la repulsion. Lo nostre mond doncas solament seriá un d’aquestes monds e pro.
Scientificament s’a podut demostrat qu’un còp qu’un univèrs comença la sieuna expansion o Big Bang s’arresta pas de créisser. Aquò seriá una vertat scientifica per totes los universes. Seriá doncas possible e logic qu’aquestes aguèsson d’accidents o chocs los uns contra los autres. La teoria del multivèrs poiriá aital ajudar a trobar una solucion a divèrses problemas de la mecanica quantica qu’encara son un misteri per la sciéncia dempuèi fa sègles.
Una teoria scientifica controvertida
Mas encara se poguèt pas confirmar scientificament que i a divèrses universes. En 1957 qualquens scientifics ja afirmèron qu’aquesta idèa poiriá èsser mai que reala mas tanben i a de scientifics contràris a aquesta teoria e dison que jamai poirá èsser demostrada scientificament. Mas Chary cre que lo senhal trobat confirmariá qu’aqueste autre univèrs descobèrt es plan desparièr del nòstre. I poirián aver dinc a dètz còps mai de fotons e de barions que non alnòstre univèrs.
La rebastida d’un univèrs primitiu per comprendre l’univèrs actual suggerís que lo nòstre univèrs es solament una region laguens una autra superegion mai granda encara en expansion- çò ditz Chary -. Mas tanben i a d’autras regions a costat del nòstre univèrs e amb d’autres paramètres físics desparièrs del nostre”.
En mai d’aquò, una autra còla scientifica de las universitats estatsunitencas de Griffith e Califòrnia an confirmat tanben que i a desparièrs monds e qu’aquestes an d’influéncia los uns sus los autres per repulsion. Aquò explicariá aital lo movement de divèrsas particulas microscopicas. Segon aquesta còla scientifica l’abilitat de las particulas quanticas d’èsser en dos estat físics al còp se poiriá compréner se i an divèrses universes e monds. E las particulas an aital los dos estats al còp.
Segon la teoria del multivèrs, doncas, lo nostre univèrs seriá solament un demest autres. Qualqu’ns serián identics al nòstre, mai d’autres serián plan desparièrs. E i auriá una fòrça universala de repulsion entre aquestes monds que los fariá desparièrs. Totes aquestes monds serián reals e existirián eternament en lo temps amb las sieunas pròpias caracteristicas.
Christian Andreu
