Es una descobèrta mai qu’estonanta. La sciéncia a pogut confirmar que la descripcion mai anciana jamai facha per l’èsser uman d’una erupcion volcanica se tròba en Occitània. En la balma preïstorica de Chauvet. Los arqueològs qu’an descobèrt las pinturas afirman qu’aquelas an mai de 36.000 annadas.
E òc. Son d’imatges de volcans en erupcion, pintats en roi sus blanc e maugrat que ja foguèron descrichas en 1994 es ara que las imatges an trobat un sens. Fins uèi lo jorn las imatges mai ancianas de volcans èran estadas trobadas en Çatalhöyük, en Anatolia, e an una edat de prèp de 8.000 ans.
La confirmacion del sens d’aquelas imatges venguèt après poder confirmar scientificament que i aguèron plusors erupcions volcanicas a l’airal del Bas Vivarés fa entre 30.000 e 40.000 ans e pendent aquel periòde de temps la balma de Chauvet ja èra abitada per d’umans. La datacion amb carbòni de las illustracions que i a al torn d’aquelas imatges es estada confirmada qu’a una edat parièra.
De pinturas de las mai ancianas
Chauvet, foguèt una balma qu’a unas representacions pictoricas de las mai ancianas, bèlas e complèxas de tota la planeta. Coma en d’autres luòcs, tanben i an imatges d’animals e de mans umanas. Cal ara veire se la comunautat scientifica accèpta fin finala aquesta tèsi de las erupcions volcanicas. Aquò, que fariá revisar totas las teorias sus lo sens e prepaus de las pinturas umanas preïstoricas dins de balmas.
La còla d’arqueològs, que ja a publicat las sieunas conclusions al numeric PLos One, ne confirmèt lo sens. “I aviá d’umans que demoravan prèp del flume Ardecha e foguèron testimònis de las erupcions volcanicas – çò diguèt Jean-Michel Geneste, cap de la còla arqueologica qu’a estudiat recentament aquelas imatges -. Pensam que las imatges trobadas dins la balma de Chauvet serián la descripcion mai anciana jamai facha per l’òme d’una erupcion volcanica”.
Aital, e maugrat que lo volcan situat al Vivarés es a mai de 35 quilomètres al nòrd-oèst de la balma de Chauvet, las erupcions volcanicas, soslinhèron los arqueològs, aguèron desparièras formas. Semblavan grands fuòcs d’artifici e aital foguèron descrichas en las imatges de la balma occitana de Chauvet.
Mas lo sens d’aquelas imatges, situadas al costat d’imatges de leons, mamots e d’autres animals, foguèt pas totjorn tan clar. Après la sieuna descobèrta en 1994, los paleontològs confessèron que sabián pas res sus lo sens d’aquelas imatges que i aviá entre rinocèros, cèrvis e leons. “Son unas imatges plan pauc comunas e anacronisticas pr’amor que son pas figurativas, çò diguèt Geneste”.
De mai, la còla de Geneste pensa que los umans que demoravan en Chauvet representavan normalament en Chauvet d’animals dins la balma. Mas l’erupcion o erupcions volcanicas que i aguèron a l’epòca foguèron tan grandas que volguèron tanben las representar coma simbòl d’una manifestacion extrèma e perilhosa del mond natural que i aviá al torn d’eles.
Christian Andreu*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
