L’UE adoptèt, fin finala, la Lei de Restauracion de la Natura. La nòrma, malgrat que ja foguèsse estada pachada, poguèt pas èsser adoptada fins al la limit de temps e encara i aguèt un moment de dangièr pr’amor qu’Ongria cambièt la siá posicion a la darrièra ora.
Per ansin, l’UE adoptèt aquela nòva lei lo 17 de junh de 2024 après mai d’una votacion. Pasmens, ara ja se pòt dire d’un biais oficial que la lei foguèt, fin finala, e definitivament, adoptada per totas los païses de l’UE. Es la primièra lei de l’UE qu’obliga totes los estats membres de restaurar la natura quand es estada de per abans atacada.
Aquò vòl dire que la natura en territòri europèu serà desenant protegida. Lo camin per poder arribar fins aquí, totun, foguèt pas brica aisit, car i aguèt de suspresas als darrièrs moments, quand Ongria cambièt de posicion que calguèt l’intervencion d’Àustria per la poder adoptar. Malgrat aquò, aquel país anoncièt que portariá la lei a la Cort de Justícia de l’UE.
Una reüssida al darrièr moment
Viena cambièt de posicion tanben al darrièr moment e aquò permetèt al Conselh de l’UE de poder adoptar aquesta lei esperada per un nombre sufisent de vots. La caliá poder adoptar per un minimum del 65% de la populacion dels estats de l’UE e foguèt adoptada, fin finala, pel 66,07%.
En mai d’aquò, lo reglament que desvoloparà aquesta nòva Lei de Restauracion de la Natura ja èra estat pachat e negociat pels estats que l’aprovavan e tanben pel quite Parlament Europèu, que la votèt en febrièr passat.
Aital, sonque demorava lo vejaire del Conselh de l’UE. Totun, lo cambiament d’opinion d’Ongria al darrièr moment faguèt riscar la non-adopcion de la lei car aquel país èra entre los païses contraris dempuèi març d’ongan.
“Çò que cal far ara es daissar endarrièr l’ideologia e trabalhar amassa”, çò diguèt lo comissari europèu encargat de l’environament, Virginijus Sinkevičius. E mai fins al darrièr moment la situacion foguèsse inquietanta, car la lei la criticavan Alemanha, Grècia e Danemarc. Cal remembrar que la quita ministra de l’environament espanhola reconeguèt que la lei esglasiava.
D’autre caire, la ministra de l’environament austriaca, Leonore Gewessler, diguèt : “D’aicí a 20 o 30 ans poirai mostrar la beutat del nòstre país als mieus felens e dirai que faguèri tot çò que poguèri per salvar la natura”.
Pasmens, aquel cambiament de posicion d’Àustria tanben entraïnèt una rompedura dins l’executiu d’aquel país puèi que i aurà d’eleccions en setembre venent: d’efièch l’ÖVP, lo partit d’extrèma drecha que tanben es dins lo govèrn austriac, s’opausava al 100 % a la lei. E après lo vòte, se calguèt preparar per de nòvas eleccions legislativas en Àustria.
Per ansin, la nòrma foguèt, fin finala, adoptada per Bulgaria, la Republica Chèca, Danemarc, Alemanha, Estònia, Irlanda, Grècia, França, Espanha, Croàcia, Chipre, Letònia, Lituània, Luxemborg, Malta, Àustria, Portugal, Romania, Eslovènia e Eslovaquia, mas recebèt lo vòt contràri d’Itàlia, d’Ongria, dels Païses Basses, de Polonha, de Finlàndia e de Suècia amb l’abstencion de Belgica.
De recordar que la Comission Europèa presentèt en 2022 aquesta lei per poder restaurar per 2030 almens lo 20% de totes los ecosistèmas en declin, e la mitat d’aquestes per 2050. Tanben los camps agricòlas. La tòca èra de jónher la lei als Acòrdis de Biodiversitat de las Nacions Unidas, mas es venguda simbòl de lucha ideologica dins l’UE, que ganhèt en intensitat après las eleccions europèas del 9 de junh de 2024.
D’efièch, lo Parlament Europèu foguèt plan atacat pel president del Partit Popular Europèu (drecha), Manfred Weber, e tanben pel lobby agricòla COPA-COGÈCA, a mai dels partits d’extrèma drecha. Totun, ara es enfin adoptada.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
