L’adaptacion dels inuits al freg e a la dièta marina a trobat ara una explicacion scientifica. Un estudi genetic dels inuits de Groenlàndia confirma qu’an dos gèns —los TBX15 e WARS2— que los an pas d’autras populacions umanas. Segon los scientifics qu’an efectuat l’estudi, aquestes gèns poirián venir dels denisovans.
Per aquela rason, la còla scientifica de Fernando Racimo —del Centre Genetic de Nòva York— prepausa que los denisovans avián una pèl fòrça sorna. Aquò los auriá faches totalament desparièrs dels Neandertals, qu’aurián aguda la pèl fòrça clara. Es una de las conclusions del nòu estudi scientific realizat sus l’origina mai luenchenca d’aquesta populacion artica.
“Voliam trobar los gèns responsables de las adaptacions biologicas dels umans en Artida—çò diguèron los scientifics—. Après far un estudi prigond de la genetica presenta dins la populacion inuit de Groenlàndia, avèm pogut far d’estatisticas e confirmar qu’an plusors gèns que fan d’eles una populacion fòrça singulara e desparièra d’autras de la planeta”.
Aital, en tot far l’estudi genetic, la còla de Racimo a trobat doas regions geneticas que son fòrça particularas. Una d’elas conten lo gèn WARS2 e l’autra lo TBX15. Per los trobar, los scientifics an analisat de donadas geneticas de mai de 200 inuits de Groenlàndia e los an restacats amb lo Projècte dels 1000 Gèns e tanben amb l’ADN d’espècias umanas preïstoricas coma los neandertalians e los denisovans.
De gèns que provenon d’umans arcaïcs
Los gèns TB15 e WARS2 son poguts èsser restacats als denisovans, çò que demostrariá que provenon de populacions fòrça ancianas. “L’ADN analisat sembla d’èsser restacat amb de gèns denisovans —çò diguèt Racimo—. Es fòrça desparièr d’autras sequéncias d’ADN umanas d’uèi lo jorn. Totun, encara se pòt pas negar lor relacion amb de grops umans arcaïcs que benlèu aurián tanben pogut aver aquel ADN”.
A mai, los scientifics an trobat qu’aquesta varianta genetica es pro comuna dins las populacions europèas e asiaticas e sustot fòrça abituala en cò dels inuits e de natius americans mas pauc presenta dins las populacions africanas. Per ansin pensan que son de gèns qu’aurián ajudat l’èsser uman pendent son espandiment per Siberia e Beringia e sa rota vèrs America. En mai d’aquò, la còla de Racimo tanben a pogut confirmar qu’aquesta varianta genetica inuit es fòrça desparièra dels gèns neandertalians e tanben de las populacions europèas umanas.
“Sabèm pas encara cossí, mas l’estudi suggerís qu’aquesta varianta qu’avèm trobada poiriá aver modificat la regulacion genetica dels inuits” —çò diguèt Racimo—. L’estudi es estat publicat ongan dins la revista Molecular Biology and Evolution.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
