LOS DINOSAURES RUGISSIÁN PAS MAS ROCONAVAN COMA D’AUCÈLS
Totes los filmes de dinosaures an totjorn mostrat lo grand rugiment dels dinosaures e cossí las autras creaturas n’avián paur. Segon aquesta interpretacion de Hollywood, los dinosaures fasián un rugiment òrre capaç d’immobilizar las sieunas victimas solament amb lo sieu son. Mas ara un nòu estudi scientific prepausa que los dinosaures en luòc de rugir roconavan puslèu coma fan los ausèls uèi lo jorn – a la nòstra epòca -. O cal ara poder demostrar pr’amor qu’ara, la comunautat scientifica ja es devesida; los unes dison que òc e los autres que non. Qui a rason ?
L’estudi es estat fach public dins l’International Business Times e confirma que los aucèls d’uèi lo jorn e los ancians dinosaures son de la meteissa familha e per tant an fòrça semblanças biologicas e una d’elas poiriá èsser la manièra de comunicar. Totun, aquesta nòva teoria – coma una autra que es estada coneguda fa pauc que ditz que totes los dinosaures avián de plumas, tanben coma los aucèls – es encara solament una teoria e la cal poder demostrar scientificament. Doncas i a discussion scientifica.
L’estudi es estat realizat per una còla de scientifics de l’Universitat de Tèxas en tot far una analisi prigonda dels organs vocals dels aucèls e lo tipe de sons qu’aquestes pòdon far. Après aver fach aquò an realizat una comparason amb los organs vocals dels dinosaures e i an trobat fòrça semblanças. Per tant an prepausat que los sons que fasiàn los dinosaures foguèsson en tot semblables als dels aucèls.
Una emission de sons particulara
L’analisi qu’aquesta còla de scientifics a facha confirma que fòrça dinosaures fasián de sons amb la boca barrada e aquò èra una “emission de sons a travèrs de la pèl a l’airal que i prèp de la boca mas amb aquesta barrada totalament”. E los aucèls emeton los sons en tot utilizar l’esofag mai que non pas en tot utilitzar lo lor bèc”.
Segon aqueste meteis estudi los aucèls d’uèi lo jorn an de manièras desparièras de vocalitzar. Una d’elas es a travèrs de sons que fan amb la boca barrada per atraire lo partenari o per defendre lo lor territòri. “Las nòstras conclusions son que la vocalizacion amb la boca barrada a evolucionat fins a 16 còps entre los arqueosaures, un grop qu’inclutz los aucèls, los dinosaures e tanben los cocodrils –çò diguèt Chad Eliason, de l’Universitat de Tèxas – Solament los animals fòrça grands pòdon produire aqueste tipe de vocalizacion e del mai grand es l’animal, del mai sovent o fa”.
Aital, l’emission de sons en cò dels aucèls e cocodrils d’uèi lo jorn suggerís que tanben poiriá aver existit en d’autras espècias d’arqueosaures, coma los dinosaures. E se los aucèls, çò dison aquestes scientifics, utilizan uèi una vocalizacion amb la boca barrada pendent lo ritual de reproduccion , benlèu los dinosaures tanben o fasián. Lo nòu estudi, al delà d’aquò, tanben balha de pròvas encara qu’aquestas son totas fossilas e non pòdon demostrar al 100% cossí exactament los dinosaures emetián los sons, mas es segur que roconavan coma los aucèls puslèu que rugissián coma los leons.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
