I a de cercaires qu’afirman que la figura del paire nasquèt apuèi s’associar amb la maire: tradicionalament las femelhas comercializavan lor fidelitat sexuala segon la noiridura que donava lo mascle. Ara divèrses antropològs occitans confirmèron que la paternitat nasquèt fa aperaquí 5 milions d’ans pr’amor qu’una tièra de mascles decidiguèt li donar mai noiridura a lors filhs biologics.
Aquò foguèt un fach pas aisit de confirmar scientificament pr’amor que çò que fa diferent l’èsser uman d’autres primats es justament la paternitat. Mas, quand nasquèt la paternitat? Una nòva teoria prepausada per de cercaires occitans e estatsunitencs afirma qu’aquesta se desvolopèt plan quand los mascles aguèron mai besonh de s’associar per la noiridura amb las femelhas.
Per ansin, la nòva teoria antropologica demòstra que l’associacion entre de femnas e mascles per ajudar los filhs foguèt basica a l’ora de capitar pendent la longa istòria de l’evolucion umana, per rapòrt a d’autras espècias omininas: los mascles donavan de noiridura e las femnas donavan als mascles descendència, tot segon una còla de cercaires de l’Universitat occitana de Tolosa e de Nòu Mexic.
L’èsser uman es plan diferent d’autres mamifèrs que suenhan pas normalament lor descendència. Uèi lo jorn la majoritat de las comunautats umanas an la paternitat coma una figura clau. Per ajudar a créisser los filhs, los umans provesisson noiridura fins a doas decadas de temps. Mas aquò que pòt semblar normal es brica comun dins las societats d’autres primats actuals.
De DADS e de CADS
Segon aquesta còla de cercaires de Tolosa tot comencèt quand una part dels mascles, los nomenats DADS, comencèron a s’espandir al costat d’un autre tipe de mascles, los CADS. Los primièrs menavan noiridura a las femnas e lors filhs. Los autres pas. Aquò es dire tanben que las maires comencèron a preferir aqueles mascles qu’ajudavan mai amb la noiridura e pas los autres.
Aital lo nòu paire balhariá de noiridura a la femelha e lor filh e caliá pas pus competir amb d’autres mascles de manièra biologica, car los CADS menavan pas de noiridura a las femnas e lors filhs. Aquò foguèt brica competitiu per eles e los DADS s’espandiguèron mai e mai. En mai d’aquò, las femelhas comencèron a èsser fisèlas sexualament amb los DADS.
La còla d’antropològs e economistas occitans e estatsunitencs qu’estudièt tot aquò afirmèt que çò que provoquèt aquel cambiament sociologic foguèt una granda secada que patiguèt Africa fa entre 8 5 milions d’annadas. Pr’açò, dison, çò que provoquèt lo cambiament foguèt al còp un cambiament environamental.
Alavetz, una màger cooperacion entre de femnas e de mascles entraïnèt un benefici a l’ora de cerca de noiridura: los mascles menavan de grassas e las femelhas d’idrats de carbòni. La soma de tot aquò entraïnèt una dièta plan mai nutritiva per ambedos sèxes e una màger subrevivéncia coma espècia.
En tot aver de femnas fisèlas entraïnèt tanben una màger cooperacion entre los mascles a l’ora de caçar pr’amor que patissián pas pus per las femnas e la caça daissèt d’èsser una prètzfach isolat. E tanben i aguèt mens e mens fam. Amb mai noiridura doncas las femnas èran mai fisèlas amb los DADS e aquestes contunhèron de s’espandir entre totes los autres mascles, mai e mai, fins que foguèron la majoritat.
Uèi lo jorn encara i a de CADS. Mas los DADS contunhan d’aver d’avantatge biologic sus los primièrs e i a pas pus cap competéncia dins la quita espècia. Los filhs biologics son los eiretièrs biològics mas tanplan culturals de lors paires, los DADS. E doncas, çò de preveire, es que n’i aja de mai en mai. E tot aquò, a mai, pòt far cambiar l’estudi que i a sul registre paleontologic e arqueologic uman trapat fins ara.
La Redaccion
