Lo raubatòri d’un rei es un fach fòrça inhabitual. Totun, Ricard Còr de Leon, rei d’Anglatèrra e Aquitània demorèt dins una preson austriaca gaireben tres ans. Quand la siá maire, Alienòr d’Aquitània, paguèt 80.000 marcs, foguèt liberat, mas la siá santat ja èra pas de las bonas.
Mas lo rei anglés Ricard Còr de Leon (1189-1199 ) auriá pogut morir en preson pr’amor que lo seu fraire Joan sens Tèrra aviá pagat, amassa amb lo rei de França, Felip II, una granda quantitat d’argent per la retencion de Ricard Còr de Leon en preson. Mas l’Emperaire de l’Empèri Romano-Germanic lo volguèt liberar pr’amor que la siá maire, Alienòr d’Aquitània aviá pagat lo rescat mai grand de l’istòria per la siá liberacion.
Lo rei anglés èra estat fach presonièr en 1192 quand tornava de las Crotzadas. Lo seu batèu s’èra encalat en mar prèp del nòrd d’Itàlia, cap a Aquilea, e decidiguèt de tornar a Anglatèrra per Austria. Malgrat qu’anava desguisat per çò que voliá pas córrer cap de risc, foguèt identificat prèp de Vièna. Foguèt alavetz retengut per lo Duc d’Austria, Leopold V, e menat fins a l’Emperador Enric VI d’Alemanha.
Presonièr pendent d’annadas
A Ricard Còr de Leon li calguèt demorar cautiu, en preson, pendent d’annadas en tot esperar que los sieus fraires lo poguèsson o lo volguèsson liberar. Mas lo regent del tròn anglés, lo sieu fraire Joan sens Tèrra, decidiguèt que valiá mai téner Ricard en preson que non pas en Anglatèrra. Lo papa Celestin II faguèt pas tanpauc cap de mediacion per l’ajudar a sortir de preson. Ricard Còr de Leon demorèt al castèl de Dürstein fins 1194.
Alienòr d’Aquitània poguèt, fin finala, amassar lo prètz demandat per la liberacion del seu filh Ricard. Èra una soma fins a cinc còps lo revengut reial anual del reialme anglés e après lo pagar, Ricard Còr de Leon foguèt liberat en febrièr de 1194. Ça que la, après doas annadas de preson s’èra demesida mai que mai e definitivament la siá santat. Ricard patiguèt divèrsas malautiás fins la siá mòrt, l’an 1199, quand assetjava un castèl en tèrras lemosinas, a aquela epòca de la corona anglesa.
Lo raubatòri de Ricard Còr de Leon aviá durat prèp de dos ans e foguèt la debuta del govèrn de son fraire Joan sens Tèrra, conegut coma Joan I d’Anglatèrra. Quand Ricard tornèt en Anglatèrra foguèt rei un autre còp mas per pauc temps. En 1199 moriguèt en laissant lo règne a las mans de Joan que començèt un règne catastrofic: perdèt totes los territòris occitans continentals qu’avián los Plantagenet dempuèi las nòças de la siá maire Alienòr d’Aquitània amb Enric I e menèt Anglatèrra a una longa guèrra civila qu’aguèt coma fin la concession de la Magna Carta, la primièra constitucion modèrna de tot lo planeta. Mas aquò es una autra istòria.
Christian Andreu
