Aiçò es la conclusion d’una còla de scientifics dirigida per Francesca Gandini, de l’Universitat de Huddersfield, Reialme Unit. Un nòu estudi confirma qu’Arabia ja seriá estada poblada fa 15.000 anadas a la fin de la darrièra Edat Glaciaria. Aquesta península seriá estada, doncas, un refugi per l’umanitat preïstorica.
Aital, la còla de scientifics estatsunitencs e europèus a realizat l’estudi en tot analitzar lo linhatge de l’ADN a travèrs d’un rar aplogrop, lo R0a, unic en Arabia e la Banha d’Africa, pr’amor que uèi s’i tròba fòrça sovent. Pasmens, uèi lo jorn se pòt trobar tanben en Euròpa e tanben fins a l’ Índia. L’estudi es estat publicat al jornal Scientific reports.
Aqueste primièr poblament d’Arabia seriá estat fach en petits grops e non s’auriá desvolopat mai fins a la descobèrta de l’agricultura, fa 10.000 annadas. Mas los scientifics consideran qu’es estada una bona descobèrta.
Un linhatge fòrça antic.
L’aplogrop R0a es un linhatge fòrça mai ancian que non se pensava. E la sieuna preséncia en Arabia tanben. Segon aquesta còla scientifica Arabia seriá estada un refugi per l’umanitat pendent la darrièra glaciacion, tanben sonada de Würm -. Las còstas de la Mar Roja serián estat un lòc amb de temperaturas fòrça mai agradivas per los umans pendent lo Pleistocèn e es per aquò que i aurián migrat fa 15.000 ans.
L’estudi tanben confirma que las pichonas populacions que demorèron en Arabia en aquela epòca aurián après migrat cap a la Banha d’Africa benlèu pendent l’epòca finala de la darrièra glaciacion pr’amor qu’ en aquela meteissa apòca arribèron d’autres umans en Arabia per cercar refugi. “Benlèu que non i aviá pas pro d’ espaci per totes “, çò confirmèron los scientifcs qu’an realizat aqueste estudi.
“La dispersion que i aguèt après – çò dison – auriá arribat fins Euròpa. E tot aquò pendent los darrièrs ans de la glaciacion. La causa foguèt l’arribada d’una o mai d’una expansion cap a Arabia d’autres comunautats umanas”.
La meteissa còla soslinha, de mai, que los umans que partiguèron d’Arabia avián un malhum comercial fòrt grand e aital lors gents aurián arribat fins a païses tant alonhats com son, al jorn d’uèi, Iran, Paquistan e tanben Índia.
La Redaccion
