Pinhans (83790) lo 07-02-2017.
Sieu naissut lo 21-01-1944 a Carnolas (83660).
Valent a dire que dins 18 jorns lo mieu atge sera de 73 ans.
Ai una filha sonada Chrysalide qu’aura 37 annadas lo 17-03-2017.
Son filh Kyle aura 9 ans lo 06-05-2017.
L’an passat ai aremarcat que mon atge
1 Era 2 còps mai grand qu’aqueu de Chrysalide
2 Era 9 còps mai grand que lo de mon felen
Autra causa
Leis atomes de carbone, oxigene, idrogene e autres que me compasan an quauques 13 milliards d’annadas. Siegue 13 seguit de 9 zeros.
Fisicament
Ma talha es de 1,73 metres.
Ma massa (que fau pas confondre amé mon pès) es d’a pauc près 80 kilogrames (o quilogrames).
A l’origina, lo mètre es estat definit a l’epoca de la Revolucion, au moment de la mesa en plaça dau sisteme decimau, era lo ¼ de la 1/ 10.000.000 (detz millioniema) partida d’un meridian terrestre. Un etalon fuguet fabricat per questa mesura de longor.
En 1889, de novelei mesuras fagueron que li aguet un novèu etalon (lo tresen) qu’es estat despausat au Pavillon de Breteuil à Sèvres (92310).
En 1960, per dei mesuras mai aisadas, la 11° Conferencia Generala dei pès e mesuras (C.G.P.M.) torna definir lo mètre coma estent 1.650.763,73 longors d’onda d’una radiacion aranjada émisa per l’isòtòpe 86 dau Kryptòn (Quriptòn).
Es pas tot : Coma la vitessa de la lum es la mema da pertot dins lo vueje de l’univers e que questa vitessa era fòrça ben coneiguda, lo mètre es estat definit ansin per la 17° C.E.P.M. en 1980 : Es la distància percoruda dins lo vueje per la lum per una durada de 1/299.792.458 de segonda.
Definicion de la segonda
Mai anetz me dire : « Coma es estada definida la segonda ? ».
Vaqui, es una polida definicion : La segonda es l’unitat de temps equivalenta a la durada de 9.192.631.770 periodas de la radiacion que correspond a la transicion entre 2 nivèus iperfins de l’estat fondamentau de l’atome de cesium.
Per mai de precisions fau que vos digue que lo cesium es un metau alcalin moligas jaune palinos, notat Cs dins la chimia. Son numerò atomic es 55, sa massa atomica 132,9054.
Avem ja un molon de chifras. Es pas acabat, vos ai donat ma massa exprimida en Kg (Qg).
A l’origina, lo kilograme es estat establit coma la massa de 1 decimètre cube (un litre) d’aiga a la temperatura de 4° celsius o centigrade.
Un cube de 10 centimètres (o 1 decimètre) conten exactament 1 litre d’aiga que sa massa es exactament de 1 kilogramme. Un prototipe se troba – coma per l’etalon de longor – au Pavillon de Breteuil à Sèvres, e coma eu es compausat de platine e d’iridium.
Lo platine es un metau preciós gris-blanc qu’es lord (densitat 21,4) e que sa fusion es a 1772°C. Es notat Pt, son numerò atomic es 78, sa massa atomica 195,08.
Avem ja charrat de la temperatura notada en °C (degrà celsius o centigrade).
Es Anders CELSIUS, fisician suedian (1701-1744), qu’a creat en 1742 la mesura decimala de la termometria.
0°C : Lo zéro degrà per lo glaç fondent
100°C : Lo cent degràs per l’aiga bolhenta
∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞
Mon telefòn fixe ven de sonar, mai l’ai agantat trop tard. Ai fach lo 31-03 per veire se lo numerò era estat memorisat. Era estat fach : començava per 09, seguit per una seria de 8 chifras. Per rapelar la persona que m’avié contactada ai picat lo 4. Era una amiga de la cieutat de La Londa des Mauras (83250) que me diguet que son companhon (un mieu amic de longa data, mai de 15 annadas) era defunctat l’an passat a l’atge de 65 ans. Alora faudrié tamben dire ço qu’es un an :
Es lo periòde de revolucion de nòstra planeta la terra a l’entorn de son estela, lo solèu qu’es situit a 1 U.A., una unitat astrònomica de la terra.
1 U.A. = 149.597.870.700 mètres
Coma l’orbita de la terra es eliptica, es lo rai mejan de questa orbita.
∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞
Ara es 3 oras dau tantost pensi que lo factor es passat, adonc sieu anat veire ma boita ai letras (B.A.L.). Au passatge, noti que 1 ora = 60 minutas = 3600 segondas.
Enca’ mai dei chiffras !
Dins ma B.A.L. vaqui ço qu’ai trobat :
Un corrier publicitari onte es escrich : « Se lo vòstre numerò personau. Es designat ganhant. Tre lo 28 febrier anetz tocar 300.000,00€ amé lo vòstre numerò de participacion 4.224.536.513
E de mai dins ma B.A.L. li avié 3 cartas de vots per questa novela annada 2017.
∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞
Après aguer legir tot aquo, me n’en sieu anat faire dei crompas, que fau ben se norrir, dins un supermercat veisin. De retorn a l’ostau, ai aregardat mon tiquet de caissa, e vos fau dire que sieu estat subrondat per una giganta avalanca de chifras :
Avièu crompat 42 articles per 127, 78€.
Avièu pagat amé ma Carta Bluia – Banca Popularia Visa – qu’expira fin 01/18 e qu’es codada amé 4 gropes de 4 chifras, amé au verso 3 autrei que compausan un dich criptograme.
Mai vaqui tota la molonassa de chifras que se trobon sus lo tiquet :
Reperatge temporau 16 :16 :01 3/01/2017
Code MO 5873 C 001 0G012 T 0223
Es marcat que l’ipermercat es dobert dau dilun au dissabte de 8ora30 a 19ora30 e lo dimenge de 9ora a 12ora30.
Que li a tant ben un « drive », que son òrari es 9ora 14ora 16ora30 19ora30
Coma possedi una carta de fidelitat matriculada 3.250.390.100-194.379.537 ai obtengut una remisa de 1,22€. E es ajustat : Totau avantatge dau jorn 0,26€. E mai : Encara 2 visitas per tocar vòstre bonus de 25% a la fin dau mès.
Es pas tot, es pas tot : Ai obtengut un bon de reduccion de 1,00€ sus 2 paquetas de croquètas per gat de 2 kilograme, fin lo 28/03/17.
E dessota pòdi legir encara d’autres còdes :
8.559.020.423
e 5873.1 03/01/17 16 :11
1.534.548
534.546
N.B. : Ai mès dei ponchs per asseparar lei serias de 3 chifras, coma se fasié temps passat, per estre mai legible. Dins lo sistème de numeracion anglo-american lo ponch es lo ramplacaire de la nostra virgula.
Es acabat per l’ipermercat
Mai ai fach d’autrei crompas dins una papetaria :
4 articles per 82,26€, amé una T.V.A. de 13,71€.
Mon tiquet client indica 6 chifras : 170.236
L’entrepresa es inscricha au registre dau comerci sota lo còde : RC B 393.871.603.000 55
∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞ ∞
Es quasi totei lei jorns ansin : dei tieradas de chifras !
Son acrocadas au nostre quotidian.
La maja part dau temps lei vesem pas, mai es una vertadiera realitat.
Totei lei chifras marcadas dins questa cronica son veraias, a despart d’una possibla deca de picatge.
Cronica de *Joan-Glaudi Babois e Kyle
Mesa en pajina de Hervé FOUÉRÉ
*Dempuèi uèi trobarètz una pichona biografia dels redactors de Sapiéncia en la seccion Qui sèm.
