LO FÈTUS JA DISTINGÍS LA LENGA
Lo ritme cardiac d’un fètus càmbia segons la lenga utilizada per la maire. Una còla scientifica de l’Universitat de Kansas, Estats Units, a fach de pròvas amb doas lengas amb de fètus e es estat confirmat qu’aqueles pòdon distingir entre las desparièras lengas ja dins l’utèrus. La descobèrta dubrís la pòrta a d’autres estudis lingüístics mai prigonds.
Aital, se totjorn, s’es dit que la lenga mairala es lo principal factor per determinar l’estructura cerebrala d’un enfant, l’estudi a demostrat mai encara: la lenga de l’enfant serà totjorn la mairala e aquel distingís ja entre la lenga mairala e d’autres quand es solament un fètus. Es la conclusion d’un estudi fach sus un dotzenat de femnas prens. Las lengas utilizadas son estadas l’anglés e lo japonés.
L’estudi es estat publicat al jornal NeuroReport per de recercaires del departament de Lingüistica de l’Universitat de Kansas e son estadas utilizadas tecnicas pas invasivas e soslinha que los fètuses mòstran desparièrs ritmes cardíacs en tot escotar una lenga o una autra. La confirmacion scientifica arriba quora lo ritme del fètus càmbia pas en tot escotar la lenga mairala mas òc una autra.
Ritmes cardiacs desparièrs segon la lenga
“La recèrca soslinha que lo desvolopament uman de la lenga comença fòrça abans – çò diguèt Utako Minai, cap de l’estudi -. Nenons amb paucs jorns ja avián mostrat de diferéncias ritmicas cardiacas desparièras segon la lenga, mas aquò va mai enlà encara. Abans de nàisser los fetus ja distinguisson entre una lenga e una autra”.
La discriminacion lingüistica, segon Minai, començariá plan abans de néisser. Los sons qu’arriban al fètus an d’interferéncias, mas lo ritme de la lenga es çò que permet lo fètus distingir entre doas lengas coma l’anglés – qu’a un ritme coma se foguèsson sons de morse – e lo japonés -, fòrça mai pausada -.
L’estudi es fach amb una nòva tecnologia apelada MCG, qu’a permés identificar los cambis ritmitcs cardiacs dels fetuses. Kathleeen Gustafson, del Departament de Neurologia del Centre d’Imaginacion Cerebrala Hoglund, n’a confirmat la tecnologia utilizada . “Aviam un dels dos unics biomagnetomètres fetals que i a uèi lo jorn als Estats Units – çò soslinhèt Gustafson. E amb aquò avèm pogut estudiar los pichons camps magnetics que i a al torn del fètus dins lo ventre mairal. Aquò compreniá ritme cardiac, alend e movements corporals”.
Aital, lo cervèl fetal se forma lèu e maugrat que i a un environament intrauterin amb de distorsion, lo fètus escota plan los sons mairals e tanben los que i a a l’exterior. Sens aquò, dison los scientifics, lo cortex poiriá pas se desvolopar plan. E aquel desvolopament es restacat amb la lenga. Los fetuses cambièron lo ritme cardiac en tot escotar lo japonés – pas la lenga mairala – e cambiavan pas en tot escoutar l’anglés – lenga mairala-.
“Las estadisticas o an demostrat – çò confirmèt Minai -. Lo desvolopament lingüistic del cervèl uman comença ja en l’utèrus. Los umans ja escotan plan la lenga mairala abans de nàisser”. Aquesta sensibilitat pre-natala a los cambis ritmics d’una lenga balharàn a l’enfant un dels primièrs espleches per parlar aprés. “Es una descobèrta susprenenta – çò diguèt Nimai –“. Nosautres tanben o cresèm.
Christian Andreu*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
