Aquestas serián las conclusions d’un nòu estudi scientific que s’a publicat a la revista Current Biology e que confirmariá que far d’exercici fisic après estudiar ajudariá plan la memòria. Totun, qu’aqueste exercici fisic a d’èsser fach en unas oras determinadas del jorn e pas just aprés finir l’estudi. Segon aquò calriá far exercici fisic 4 oras après.
“L’estudi a pogut confirmar que podem melhorar la nòstra memòria après aver estudiat – çò diguèt Guillén Fernández – del Centre Medic de l’Universitat de Radboud, en Olanda”. L’estudi faguèt divèrsas pròvas a desparièras personas un còp qu’aquestas avián estudiat per ensajar de calcular quines èran los efèctes de l’exercici fisic après l’estudi.
Los voluntaris qu’an participat en l’estudi avián una edat entre los 3 e los 90 ans e totes eles estudièron pendent 40 minutas abans de far exercici fisic. Mas los 72 volontaris faguèron aqueste exercici fisic en desparièras oras del jorn per veire s’aquò tanben èra determinant.
Segon aquò los voluntaris faguèron exercici físic en desparièras oras del jorn e de divèrsas manèras. Los qu’avián fach d’exercici físic quatre oras après l’estudi mostrèron una melhor memòria que los qu’avián fach l’exercici just après. Tot aquò poguèt èsser confirmat a travèrs de divèrsas pròvas medicas realizadas amb d’escàner.
Melhoras al cervèl
La còla scientifica qu’a fach aqueste estudi a pogut agachar que far d’exercici físic unas oras après estudiar podiá èsser associat amb de melhors representacions a l’ipocamp, un airal del cervèl conegut per lo sieu trabalh en l’aprenentatge e la memòria. L’estudi doncas confirmariá que “far d’exercici fisic unas oras après estudiar ajudariá la memòria en lo temps e tanben que calriá o far per ajudar en las malautias clinicas”. Totun, las causas d’aquò non an pogut èsser determinadas.
Maugrat aquò, d’autres estudis scientifics realizats en laboratòris e sus animals aurián coma resultat que unes compausats quimics naturals que los èssers umans an en lo cos, e sonats catecolaminas – e entre elas la dopamina e la norepinefrina – ajudarián en la consolidacion de la memòria e una manèra d’o far seriá a travèrs de l’exercici fisic. Ara calriá, segon los scientifics qu’an fach aqueste estudi determinar amb mai de precision coma es aquesta ajuda a la memòria e com se fa a nivèl molecular.
Christian Andreu
