Un nòu estudi sus lei temperaturas pendent los darriers 120.000 ans confirma scientificament que, pel premier còp dins l’istòria, lei darriers 100 ans lei temperaturas son estadas fòrça mai autas que durant los darriers 44.000 ans e benlèu lei darrieras 120.000 anadas.
L’estudi es estat publicat dins la revista Geophysical Research Letters per Gifford Miller, de la Universitat de Colorado, e amassa de donadas realizadas amb datacion per radiocarbòni a l’iscla canadiana de Baffin. Seriá, doncas, la premiera pròva dirècta dei montadas de temperaturas pendent l’epòca olocèna.
L’Olocèn comencèt fa 11.700 ans, quand la darriera glaciacion finiguèt. La còla de scientifics qu’a fach las pròvas per aqueste estudi a agut ansin la confirmacion dei pus autei temperaturas dau darrier sègle en una epòca situada entre fa 44.000 e 51.000 ans.
“Coma la datacion amb radiocarbòni n’es pas pron exacta après 50.000 ans – çò diguèt Gifford Miller – avèm obtengut mai de donadas amb de plantas culhidas per tau de conéisser l’exposicion d’aquelei pendent l’epòca de la fin de la glaciacion”.
De temperaturas alarmantas
La còla qu’a fach aqueste estudi a pogut ansin confirmar que lei temperaturas mai autas que i a agut los darriers 100 ans son fòra de tota sòrta de variabilitat naturala. E aquò, çò confirman, a coma causa principala la pus granda preséncia de gas amb efècte de sèrra dins l’atmosfèra de la planeta. Totei lei donadas foguèron trobadas a solament un metre dins lo glaç de l’iscla de Baffin, que creis de 2 o 3 mètres cada an.
Per rebastir lo clima que i aviá agut pendent d’epòcas passadas a l’Iscla de Baffin, delà lei limits de la datacion amb radiocarbòni, lei scientifics an utilizat de donadas d’autrei còlas internacionalas qu’avián obtengut ja d’informacion scientifica prèp de l’Iscla de Baffin.
“I aviá pas agut d’estius amb de temperaturas tant autas dempuei 120.000 annadas – çò confirmèt Gifford Miller -. Aquò, malaürosament confirma que lei temperaturas qu’avèm agut pendent los darrièrs 100 ans son pas naturalas”.
Aqueste nòu estudi tanben a pogut confirmar que lei temperaturas foguèron de 5 grads mai bassas entre l’an -5.000 aC e fins a l’an 1900 dC. Aquò quand lei temperaturas començan a montar un autre còp”.
La redaccion
