La descobèrta de las pinturas preïstoricas mai nautas d’Euròpa foguèt facha en 2010. Mas ara, un estudi publicat a Internet Arqueology assolida qu’una de las jòias de l’art rupèstre europèu son las pinturas situadas dins l’Abric Faravel, dins los Alps vivaro-aupencs, a mai de 2133 mètres al dessús del nivèl de la mar.
La còla scientifica qu’a realizat l’estudi, e amb ela divèrses arqueològs de l’Universitat de York, an trabalhat amassa amb lo Centre Camille Jullian, d’Ais de Provença. L’utilizacion d’escanèrs de darrièra generacion a permés de confirmar que serián las pinturas mai nautas d’Euròpa.
Per o far, los arqueològs an agut besonh de menar fins en naut de l’abric fòrças batariás de veitura e utilizar divèrses escanèrs amb de lutz blanca per acabar aquesta complèxa operacion.
Pr’aquò, las resultas son estadas pro satisfasentas. Al delà de las pinturas, la còla scientifica qu’a fach l’estudi a trobat divèrses espleches umans qu’an permés d’establir una istòria virtuala del poblament uman dins aqueste airal – del Mesolitic a l’Edat Medievala. Los arqueològs an pogut tanben tornar bastir un modèl virtual de l’environament que i aviá a aquela epòca.
Mai de 8000 ans de poblament
Una preséncia umana que comencèt fa mai de 8000 ans – epòca ont foguèron fachas las pinturas. Las pinturas son un grop de linhas parellèlas, i a tanben un cèrvi qu’es caçat e un can, çò que poiriá voler mostrar un territòri de caça.
Aital, aquestas pinturas preïstoricas serián, segon los arqueològs, las mai nautas amb de representacions d’animals en Euròpa. Dins l’abric se son tanben trobadas divèrsas estructuras de l’Edat del Bronze, d’espleches neolitics ; de ceremica de l’Edat del Fèrre e de l’epòca romana e tanben de pèças metallicas medievalas.
“Esperàvem trobar qualques representacions coma las que s’èran trobadas dins la Val de las Meravilhas – çò diguèt Kevin Walsh, del departament d’arqueologia de l’Universitat de York. Mas çò que trobèrem es estonant. Pensàvem pas trobar unas pinturas preïstoricas tant ben conservadas dins un lòc tant e tant naut. Far l’estudi es estat fòrça complèx”.
L’abric, situat dins lo Pargue Natural del Massís dels Escrinhs, ara, s’aurà de considerar coma part importanta del patrimòni preïstoric occitan. Un patrimòni dels mai importants de tota Euròpa dempuèi la descobèrta de pinturas dins de caunas coma Las Caus en Peiregòrd e que contunha fins uèi lo jorn amb l’Abric Faravel.
Malgrat qu’aquelas pinturas sián pas plan ancianas – son estadas datadas de fa aperaquí 5000 ans, a l’epòca del Mesolitic, la lor situacion fa d’elas una vertadièra jòia.
La Redaccion
