La demostracion scientifica de dos estats de l’aiga liquida poiriá jogar un grand ròtle dins los sistèmas nanomedicals e tanben optics e termics. L’estudi fach per una còla de fisicians de l’Universitat d’Oxford suggerís que l’estructura de l’aiga liquida influís sus l’estabilitat termica de las proteïnas.
Aital o an pogut confirmar Laura Maestro e una còla de scientifics a travèrs d’un nòu estudi. Aqueste, qu’es estat publicat dins International Journal of Nanotechnology, soslinha que l’aiga liquida a de proprietats determinadas fòrça estranhas que pòdon pas èsser observadas dins d’autras susbtàncias: quand se gèla s’espandís. Totas las autras substàncias conegudas se contractan quand se gèlan. E en fòrça pauca temperatura (100 grases) pòt passar de l’estat solid al liquid e al gasós.
D’autres compausats an de besonh de mai temperatura per poder cambiar d’estat. L’origina d’aquò seriá la facultat de sas moleculas per formar d’unions d’idrogèn. La carga positiva dels atòms d’idrogèn permetriá de formar d’unions amb los electrons negatius dels atòms d’oxigèn. Per ansin lo cambiament.
D’unions temporàrias
Totun, aquestas unions son fòrça cortas e temporàrias. Son tan cortas que quand l’aiga se gèla la nòva estructura pòt pas manténer la memòria de çò que s’es passat. E aquò se passa a partir d’aperaquí los 50 grases.
“Las temperaturas de transformacion son desparièras –çò diguèt Maestro– 64º per la conductivitat termica, 50º per l’aflaquiment molecular, 50º tanben per l’indici de refraccion, 53º per la conductivitat e 57º per la tension superficiala”.
D’autras proprietats de l’aiga liquida tanben dependon de la temperatura. Fa gaire, divèrses scientifics soslinhèron que lo coeficient d’expansion termica se mesurava a 42 º o mai e en aquel ponch la compression isotermica èra en un minim. E la velocitat del son arriba a un maxim quand l’aiga liquida es a 60º.
Per tant, l’existéncia de dos desparièrs estats segon una temperatura situada entre 40º e 60º poiriá aver una granda importància dins l’estudi de las nanoparticulas pr’amor que lo caractèr de l’aiga es tanben important. A mai, se pensa ara que son estructura pòt influir fòrça sus l’estabilitat de las proteïnas e sus cossí càmbian amb la temperatura.
Aquò es vital per comprene non solament lo tractament de las proteïnas dins l’indústria de la carn mas tanben cossí se produtz la propagacion de las malautiás quand i a disfoncionament de las proteïnas.
La Redaccion
Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.
