![LA NATURA, A JUTJAMENT](https://sapiencia.eu/wp-content/uploads/2024/07/NATURA-1-scaled.jpg)
Mei d’un grop ecologista europèu comènça a non pas mei poder suportar la situacion actuau de la natura e dejà comènçan aver jutjaments contra los governaments entà la soa passivitat de protegir la natura. Alavetz, e independentament de la color deu governament, qui decidirà que serà lo jutge e pas lo governament. E se los ecologistas ganhan lo jutjament, que cau restaurar la natura e la deishar com èra hè decadas.
Qu’ei çò qui’s debanè la setmana darrèra, quan un grop de mei d’80 grops d’ecologistas deu Reiaume Unit que s’amassèn entà denonciar lo governament britanic entà la pèrta de biodiversitat au país. N’impòrta pas que lo governament sia conservador o laborista. Çò que vòlen qu’ei que lo governament agesca entà protegir, fin finau, la natura. Car, cò disen, la natura anglesa ne pòt pas mei suportar aquera situacion d’ataca permanenta de las parts deus umans. E lo governament britanic a la responsabilitat d’aquò arrestar.
![](https://sapiencia.eu/wp-content/uploads/2024/07/NATURA-2-300x225.jpg)
Uei ua de cada sheis espècias animaus au Reiaume Unit que son miaçadas d’extincion. E se volem pas patir mei d’escantilhaments, çò que cau har qu’ei protegir mélher la natura pr’amor de la tòca politica adoptada peu medish governament conservator anglés entà l’annada 2030. Au demiei deus qui an denonciat lo governament anglés que i a lo Nacional Trust, lo RSPB e los Organismes de Vita Naturau Anglesa.
La tòca, 2030
Tot aquerò qu’arriba deu còp que tots los partits politics confirmèn que cau arrestar l’escandilhament d’espècias en 2030. Enqüèra la setmana passada, lo governament conservator anglés de Rishi Sunak qu’adoptè ua lei navèra entà protegir la natura. E los liberaus que digón que, se ganhan las eleccions, l’espaci protegit en 2050 que serà lo doble que l’actuau.
Mes Wildlife e Countryside Link, qu’ei ua coalicion de mei d’83 grops environamentalistas anglés, que vòlen ua responsa deu governament anglés pr’amor que disen que la soa activitat ei plan passiva a l’ora de protegir la natura.
Tanben l’Oficina entà la Proteccion Environamentau anglesa, un organisme governamentau, qu’afirmè que lo governament ne hè pas guaire entà protegir la natura. Solament avèva començat de har quauquarren en quate cas de mai de 40 que cau agir lèu.
Richard Benwell, que dirigeish Wildlife e Countryside Link, digó que “lo país pateish un grèu declin naturau e n’avem pas vist nat responsa governamentau dirigida dab la mira de protegir la natura e arrestar aqueth declin”. Ne vau pas díser que lo Ministèri de l’environament anglés ditz pas arren quan estó demandat per aquera problematica.
![](https://sapiencia.eu/wp-content/uploads/2024/07/NATURA-3-300x123.jpg)
D’un aute costat, Hilary McGrady, directora deu Nacional Trust anglés, digó que “maugrat que solament demoran 6 annadas entà protegir lo 30% de tota la natura anglesa, Anglatèrra qu’ei enqüèra un país plen de vita naturau. Un deus màgers país europèus dab mei fauna naturau”.
Tanben lo partit conservator digó que la tòca ei protegir lo 30% d’espacis naturaus anglés, e que tanben an la tòca de crear 100 navèras resèrvas marinas a l’entorn deu país. Dab aquò que poirà estar sauvat lo 10% de la biodiversitat anglesa. Segon lo portavotz d’aqueth partit, que cau protegir mei de 500.000 ectaras, plantar 40 milions d’arbos e restaurar 35.000 ectaras adara destrusïdas pr’amor de l’activitat umana.
Entaus conservadors anglés, que cau bastir mei abitats naturaus rics, dont paluns e de horèsts, tanben de crear tanben mei d’espacis vèrts. Mes tanben que demandan mei de publicitat entà cambiar la pensada deus anglés. Ua tòca que los liberaus tanben prometen, pr’amor d’ua mei hauta consciéncia naturalista dens aqueth país. E los nacionalistas gallés e los independentistas escocés que tanben vòlen protegir mei la natura. Totun, e maugrat de tot çò que tots los partits politics digan voler, e que tots los governaments confirmen que son responsables dab la natura, pas dengun ne hasó pas arren las darrèras 20 annadas. Alavetz, com har ? Donc que cau enviar lo governament a la justícia, que digón los ecologistas. Solament atau podem protegir mélher e, fin finau, la natura.
La Redaccion
Aguesta cronica suu Ràdio país : https://soundcloud.com/radio-pais/sets/natura