La lavanda o espic o encara balhassa es lo nom balhat a un genre de plantas de la familha de lamiacèas. Uèi i a mai de 60 espècias e mai de 200 sosespècias d’aquesta planta al mond. Òm la pòt trapar pertot lo Mediterranèu, lo sud asiatic e tanben lo nòrd african car es una planta plan usada per la medecina. A mai, tanben es celèbra per la sieuna aròma. Uèi lo jorn es cultivada a totes los cinc continents de la planeta pr’amor d’aquò.
La fuèlha es temporala e es un arbrilhon salvatge que pòt arribar a far un mètre de nautor. La sieuna coròlla es de color lavanda, violeta, o blava e d’un biais mai rar blanca. Foguèt utilizada dempuèi l’epòca antica coma medecina, per ne far de tès, o tanben coma òli essencial e tanplan per lavar de nafraduras. La sieuna aròma es plan caracteristica e pr’amor d’aquò venguèt una planta plan utilizada per crear de perfums, dins l’aromaterapia e la creacion de desodorizants. Tanben es usada per far fugir d’insèctes dins d’armaris e tiretas.
L’usatge medecinal
L’usatge medicinal de la lavanda es divèrs. Pòt ajudar a luchar contra lo raumàs e la grip, coma regenerador de celulas, coma analgesic o coma calmant. Tanplan es usada per arrestar la naissença de cremadas o encara d’ampolas. Lo poder qu’a coma desinfectant es plan naut e tanben es un bon antiseptic. A de proprietats antiinflamatòrias e se pòt utilizar contra l’artritis e lo raumatisme.
L’espiga de la flor de lavanda es destillada per crear d’òlis essencials que pòdon ajudar plan a melhorar la dolor musculara o encara lo mal de cap. L’espic es tanben usat amassa amb l’aloè vera per crear una tonica amb de proprietats refrescantas o atanben coma exfoliant natural per far mai suava la pèl. La flor de la lavanda tanben a una fòrta aròma naturala, e pr’açò pòt èsser tanben usada coma desodorizant natural.
La tisana de lavanda a tres usatges; coma digestiu aprés manjar, per luchar contra lo mal de cap provocat per l’estranci e per melhorar la sòm. Alavetz que cal la beure abans d’anar a dormir. Atanplan es plan bona per luchar contra l’asma, lo mal de cap, la depression o encara la tension nerviosa.
Quand es usada per far d’òlis òm pòt l’utilizar coma òli blos per luchar contra fisadas d’insèctes o encara amb d’aiga per suenhar de cremadas solaras. Puèi òm l’utiliza coma òli per far un massatge, pr’amor qu’ajuda a finir la dolor musculara o encara lo mal de cap. Per aquò far que cal aplicar divèrsas gotas als tempes e puèi i far un pichonèl massatge sus aquelas.
Fin finala, es tanben usada per lavar los cabèls en tot apondre vint gotas d’òli de lavanda dins un litre d’aiga. Tanben pòt èsser usada per desinfectar lo cap de parasits en tot getar d’òli de lavanda sus la penche e puèi brossar lo cabèl. La resulta es la meteissa.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
