La flor d’Udumbara o Youtan Polou es una flor plan restacada amb lo mond de la legenda. Segon los budistas es una tras que pichonela flor que sonque florís cada 3 000 annadas. En 1997 lo monge nomenat Kim Hairi descobriguèt aquela flor sus una estatua de Boda pel primièr còp, dins un temple de Corèa del Sud. Segon ditz la legenda cada còp que naisson aquela flors de sonque 1 mm de diamètre es lo senhal de l’arribada de Dieu. Lo darrièr còp que foguèron agachadas foguèt abans de la naissença de Boda. Ara de bodistas per tota la planeta defensan qu’un grand savant es a mand d’arribar a la Tèrra pr’amor d’aquelas flors.
Una legenda antica
Aquel legenda bodista confirma que, amb las flors, arribarà lo Grand Rei que fa Virar la Ròda del Mond en tot cambiar lo Fa o lei del cèl. Aqueste rei accepta totes parièr e es pas importanta la religion. Seràn sauvats pr’amor de la compassion. Tot demòra escrich en un libre sus las Profecias Huilin, ont òm afirma qu’es una flor celestiala e qu’existís pas al nòstre mond. E se un savant (rulai) o lo quite Rei de la Ròda Daurada arriban, de primièr arribaràn las flors d’Udumbara.
D’efièch es una flor plan pichonela e tanben fòrça resistenta. I a de personas que trapèron la flor d’Udumbara fa pas gaires ans e la poguèron espepissar pendent longs periòdes de temps e la flor morissiá pas. Benlèu pr’açò lo mite bodista, car segon mai d’un temple bodista, òm considèra que la flor d’Udumbara, tanben coneguda coma Youtan Polou, a una origina celestiala. 
Udumbara vòl dire Flor Bona que Ven del Cèl en sànscrit. Son de flors blancas coma la nèu, e sonque arriban als 3 mm de longor. Creisson sonque en d’airals malaisits d’arribar, aquò vòl dire que son brica comunas. Mas pas degun encara sap d’on venon. Poiriá plan èsser que la sieuna grana arribèsse amb l’aire pr’amor que creisson sus de metal, de veire, de fibra, una autra flor, eca. Cossí que siá, es una flor plan misteriosa que supòrta brica lo Solelh nimai l’oratge. A pas de besonh d’aiga o tèrra e sonque pòt viure aperaquí 40 jorns. Benlèu ne far un estudi prigond ajudariá plan a la conéisser melhor.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
Aqueste article es tanben publicat dins Naturaleza Salvaje, un numeric de geografia e l’environament, que Sapiéncia n’a un acòrdi de cooperacion
