Parlar de la flor de sang (Asclepias curassavica) es parlar d’una espècia nativa de planta de clima tropical american del genre Asclepias. Es una espècia de la familha Asclepiadaceae. Uèi lo jorn òm pòt la trapar plan en diferents luòcs de la planeta, malgrat èsser originària del continent american.
Per ansin, es una flor que recep tanben d’autres noms populars, coma pichon platan, èrba de Maria o encara aucidora d’elevatge o encara blagaira. Òm cultiva aquela polidòta planta per la sieuna beltat pertot. Son de plantas qu’apertenon a l’òrdre dels arbrilhons e que pòdon arribar aisidament a far un mètre de nautor.
Una planta tropicala
Asclepias curassavica a la camba de color grisa e de fuèlhas opausadas e ponchudas. Las flors d’aquesta bèla planta son terminalas e creisson amassa en de grops d’entre 10 e 20 flors cadun. Las coronas son de color roge e los lòbes de la corona son jaunes o de color iranja. Es pr’açò que tanben recep lo nom de bandièra espanhòla. Los fruches son fusifòrmes e pòdon far entre 5 e 10 cm de longor. Son nomenats foliculs e an de granas ovalas escuras d’entre 6 e 7 mm de longor.
Las granas an de pèls suaus qu’ajudan la grana a flotar en l’aire quand i a un pauc de vent e es alara quora los foliculs se dubrisson, en tot florir gaireben pendent tot l’an. Val pas dire que son de polidas flors plan bonas per totes los jardins de totes los ostals de la planeta, malgrat èsser a l’origina, de plantas de clima tropical.
La flor de sang es una espècia plan comuna pertot lo continent american. Totun, es originària sonque d’airals tropicals d’aquel continent. Malgrat aquò, foguèt tanben introducha als estats meridionals d’Estats Units, coma Califòrnia, Florida, Loisiana, Tennessee e encara Tèxas, a mai d’Hawaii. Tanben es estada introducha en Puerto Rico e las Illas Verges.
L’Èrba de Maria tanben es estada introducha per l’èsser uman al continent asiatic, mai que mai en las províncias d’Anhui, Fujian, Guangdong, Guangxi, Guizhou, Hainan, Hubei, Hunan, Jiangsu, Jiangxi, Qinghai, Sichuan, Xizang, Yunnan e Zhejiang de China, e tanplan en Taiwan.
D’un autre costat, es una flor plan coneguda pr’amor qu’ajuda plan coma medecina a l’ora de trincar de caissals. I a cèrts estats del centre e sud mexican ont es usada per garir cèrts problèmas dentals dont caissals cairats. Çò qu’òm cerca amb l’aucidòra d’elevatge es redusir la dolor e tanben poder extreire la peça dentala en tot la trincar.
En mai d’aquò, la flor de sang tanben es usada quand òm patís la nhacadura o l’ataca d’una sèrp, pr’amor que, a la region mexicana de Puebla, per exemple, òm còi la planta e puèi òm l’usa sus la part nhacada per provocar una temperatura pus nauta d’aquela zòna. Òm tanben pòt l’usar sens la coire. De remembrar qu’òm tanplan pòt l’usar parièr amb de nhacaduras d’escòrpi o de cèrt tipe e mòsca. E o far es plan positiu pr’amor de la siá bona resulta.
Un article d’Andrés López*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
