Lo mond de las plantas es extraordinàri. Ara, un recent estudi confirma que de plantas coma Solidago altissima, una planta nòrd-americana de las familha de las Astaraceae, pòt percebre d’autras plantas pròchas sens las tocar, sonque amb la lutz reflectida a travèrs de las sieunas fuèlhas. Quora aquesta planta es manjada per d’erbivòrs, aquesta respond d’un biais o autre segon se i a tanben d’autras plantas prèp o pas. La responsa es plegadissa e totjorn adeqüada al moment. E los cercaires se demanan se aquò es pas un símbol d’intelligéncia.
Per ansin, la responsa a l’estranci environamental d’aquesta planta es estada estudiada longament dins lo sieu contèxt ecologic. E aquò entraïnèt una granda discussion dins la comunautat scientifica. Los cercaires qu’estudièron la planta ara afirman qu’aquel tipe de responsas es sinonime d’intelligéncia e que liga plan mai la planta al sieu environament a travèrs de l’intercambi d’informacion quimia.
Definicions diferentas
« I a mai de 70 definicions desparièras sus l’intelligéncia, çò diguèt André Kessler, de l’Universitat de Cornell. Qualcunes creson que l’intelligéncia a de besonh un sistèma nerviós central amb de senhals electrics per poder processar l’informacion. Totun, çò apondèt lo cercaire, qualcunas plantas analizan l’informacion amb lo sistèma vascular e aquò ajuda la planta a comprene l’informacion recebuda e poder aital respondre ».
Kessler e Michael Mueller volguèron explicar mai aquel concèpte : « I a pas cap organ d’una planta que pòsca èsser restacat amb un sistèma nerviós central. E aquò malgrat que podèm trobar de senhals electrics en las plantas. Alara, cossí fan per recebre d’informacion de l’environament e poder respondre d’un biais o un autre ? « .
Per poder aquò melhor comprene, aquestes scientifics daissèron la definicion d’intelligéncia restacada amb sonque una abilitat ; la de poder resólvre de problèmas segon çò qu’arriva dempuèi l’environament. E pr’açò aquestes dos cercaires analizèron cossí fa Solidago altissima quand es atacada per un flagèl.
Quora cèrtas larvas de coleoptèrs atacan aquesta planta, aquesta lença d’informacion quimia a las larvas en tot soslinhar als pichonèls insèctes que la planta a pas de santat e qu’es plan paura coma noiridura. Aquestes senhals quimics son nomenats VOC (compausats organics volatils) que tanben son recebuts per las autras Soligado que i a al sieu torn e tanben començan a lençar lo meteis senhal quimic contra las larvas de coleoptèr. Atal pòt la planta subreviure l’ataca d’aqueles predators en tot distribuir l’ataca dels insèctes.
Puèi, en 2022 los cercaires demostrèron que la planta pòt recebre la lutz reflectida en las fuèlhas d’autras plantas e aital conéisser que son ailà. Se aquelas plantas son prèp e la planta es atacada tornarmai per las larvas dels coleoptèrs, creisson mai lèu e tanben començan a a produire de compausats coma defensa per poder luchar contra lo flagèl. Se i a pas de plantas vesinas las plantas creisson pas mai lèu quora son atacadas e la responsa quimia es plan desparièra.
« Aquò liga plan amb l’idèia d’intelligéncia, çò diguèt Kessler. Segon l’informacion recebuda, la planta cambia la sieuna conducha. E las Solidago que i a al sieu torn quand recebon aqueles VOC tanben reagisson d’un biais o autre. Lo senhal anoncia totjorn la preséncia d’erbivòrs e segon aquò fan una causa o una autra. Cal soslinhar que parlar d’intelligéncia vegetala pòt entraïnar parlar de comunicacion vegetala ».
“Car lo cervèl seriá tota la planta entièra qu’a pas de besonh un sistèma central per respondre. En luòc d’aquò lençan de senhals electrics a mai de quimics, çò afimèron los cercaires ». E d’autres estudis confirmèron que las cellulas vegetalas pòdon plan recebre d’informacion exteriora e qu’an de molleculas sensorialas que trapan de VOC lençats per d’autras plantas. Pòdon aital aulorar plan lor environament.
“Las cellulas vegetalas se comunican a travèrs de senhals quimics que provòcan una responsa. E aquò es una idèia pas abans estudiada, çò afirmèt Kessler. L’estudi foguèt publicat al numeric internacional Plant Signaling and Behavior.
La Redaccion
