Eth linx iberic, tanben coneishut damb eth nòm de lop cervièr, poderie tornar lèu lèu a Catalonha, segontes çò que didec era Secretaria de Transicion Ecologica dera Generalitat de Catalonha. Ua des rasons entà lo reintrodusir un aute còp en aguest país ei que cau redusir era populacion de conilhs que i a aué. Tanben poirie ajudar a hèr créisher eth torisme enes Pirenèus.
Atau, eth lop cervièr poderie èster reïntrodusit en Catalonha entà redusir era populacion actuau de conilhs. Era Secretaria de Transicion Ecologica dera Generalitat vò atau recuperar un ancian projècte e ja se prepara entà méter-lo en marcha e arténher ua populacion mès petita de conilhs en Catalonha.
Manca d’equilibri environamentau
Jordi Sargatal, secretari generau entàs qüestions ambientaus e transicion ecologica, expliquèc ara television catalana qu’eth linx ei ua des pèces que cau entà auer un ecosistèma mès equilibrat en quauqu’ues regions catalanes, coma es Garrigues o era Noguera, que serien bèri uns lòcs ont poderie èster reintrodusida aguesta beròia espècia.
“I a airaus on i a fòrça conilhs. Cau tanben auer ua preséncia minimau de carretères entà evitar accidents e tanben poder parlar damb es actors sociaus der airau entà assegurar qu’eth linx non causarà cap predacion der elevatge, çò expliquèt Sargatal”.
Segontes eth departament catalan, era tornada deth lop cervièr a Catalonha serie util entà auer un torisme mès viu en Plan d’Urgèl. “Serà bon entath ecotorisme deth país”, çò apondec Sargatal. Ath delà, Sargatal confirmèc qu’era tornada deth linx a Catalonha deuerie èster vista coma un sagèth de qualitat toristica entath environament. Pr’amor que lo luòc pòt admetre ben un animau coma eth lop cervièr. “Serà positiu pr’amor que vò díder qu’es umans deth territòri son capables de víuer damb eth linx”.
Cau rebrembar qu’era populacion actuau deth linx o lop cervièr iberic (Lynx pardinus) en estat espanhòu en 2023 situe era espècia en mès de 2.000 especimèns, segontes eth MITECO. Atau, aué i a 2.021 lops cervièrs en estat espanhòu; 1.730 en Andalosia e 291 en Portugau. Per comunautats autonòmes, Andalosia n’a aué 755 individús, e Castelha-La Mancha 715 especimèns. En Extremadura n’i aurien 253 animaus e en Murcia 7 mès.
Era Redaccion
