Auem cambiat de sègle e tanben de manèra de hèr era guèrra. Cada còp mès s’utilize drònes e atacs cibernetics contra es auti. Pòt èster aquerò un fenomèn temporau o es ciberatacs seràn cada còp mès eth futur dera guèrra?
Non hè guaire temps era enterpresa Sony auie hèt un film en quau eth lider de Corea deth Nòrd non gessie guaire ben retratat. Era enterpresa patic un ciberatac via internet, que provoquèc çò que cercaue:qu’eth film non poguesse èster vist. E aquerò precisaments ei çò qu’a hèt Sony, tirar eth film deth visionatge peth gran public. Aquerò poderie èster un simptòma deth nauèth tipe de guèrra qu’auram en futur mès pròche: era ciberguèrra.
Serà atau pr’amor qu’es païsi, organizacions o enterpreses multinacionaus que hèn atacs cibernetics laguens eth hialat globau an mès interèssi en destrusir o auer determinat tipe d’informacion que non pas en tuar o auer victimes convencionaus.
Ua manèra de destrusir er enemic qu’ei aguesta: copar es sues telecomunicacions o capturar bères ues informacions que poderàn èster utilizades contra es auti mès endauant. E per aquerò madeish, mès e mès govèrns creen cellules cibernetiques que pòden defénder eth hialat des atacs cibernetics cada còp mès presenti.
Non hè guaire, quauqui hackers pogueren entrar sus Twitter e tuitejar que Barack Obama auie estat herit en un atemptat. Wall Street perdec mès de 136.000 milions de dòllars en sonque dues minutes. Alavetz, qui pòt protegir eth hialat dera publicacion de notícies coma aquera ?
‘Ciberguèrra’ ei un mot que fòrça govèrns ja definissen com un hèt pejor encara qu’eth terrorisme. Atau pensen en govèrn des Estats Unidi, qu’an decidit qu’era ‘ciberguèrra’ ei ua prioritat encara mès grana que non pas eth terrorisme islamic o era menaça nucleara der èish deth mau d’Iran e Corea deth Nòrd.
Es americans ja an creat USCYBERCOM, eth comand cibernetic que lute contra es atacs des enemics des Estats Unidi. Atau an hèt es alemands, dab era creacion deth BND o es olandesi, dab eth CNSC. Païsi petiti coma Catalonha an creat tanben es sues cellules qu’an de protegir es telecomunicacions des atacs d’auti païsi vesins. Eth dia qu’es catalans anèren votar sus era sua independéncia, eth govèrn catalan patic eth dusau pejor atac a nivèu mondiau dera istòria dera ciberguèrra enquia aqueth moment. Qui ac pagaue?
Es atacs cibernetics dera actuau ciberguèrra que quauqui scientifics diden que patim toti, se sosdividissen en atacs DOS (Denial-of-Service), atacs ara corrent electrica, e captura o destruccion d’ordinators non pròpis. E era caduda deth server ei tanben un des atacs mès utilizadi recentaments.
China vs Estats Unidi
Ena actuau ciberguèrra dejà començada entre es chinesi e es americans, non i a pas d’expèrts tà contrarrestar es atacs. Eth govèrn de Barack Obama ja a demanat a milèrs de persones trabalhar ena ciberguèrra. En Corea deth Sud sonque i trabalhen ara 400 persones mès eth sòn vesin deth nòrd ja n’a 3000. E cada dia i a besonh de mès e mès trabalhadors tara ciberguèrra.
Peth moment, es americans, que non guanhen, an podut auer un armistici dab es russi. Ven que ara non pòden lutar contra tanti enemics ath còp. E prepausen que diuèrsi païsi signen un convèni segontes eth quau eth hialat globau, Internet, demorarie hòra des atacs cibernetics: ei era Convention on Prohibition of Cyberwar in Internet. Mès peth moment, ei sonque un projècte.
Diden qu’es chinesi, se guanhen aquera ciberguèrra actuau, poderien èster es naus mèstres deth mon. E dab eth domeni deth hialat, arribarie eth dera economia mondiau. Ua causa ei clara : es russi an hèt ciberatacs contra es ucrainesi, es francesi tot dia luten contra webs islamistes, e es iranians perderen 60.000 ordinators en 2010 quan eth cibervèrmi Stuxnet entrèc en sistèma nuclear dera centrala de Natanz. E diden que darrèr d’aquerò i èren es americani e es israeliani.
Ei vertat que i a en aguests moments ua luta cibernetica a nivèu mondiau que comencèc en 2009? Era ciberguèrra ei un hèt que toti es govèrns deth mon, grani o petiti, atau coma es enterpreses, auràn de combàter ? Peth moment non se pòt demostrar arren. Sonque son causes que se diden, e non i cap de hèt de provat. Dilhèu ac @auríem de preguntar as trabalhadors d’aqueres cellules governamentaus. Sonque eri mos poderien díder s’era ciberguèrra existís. O se non existís.
Christian Andreu
