ÉS DESCOBÈRTA UNA NÒVA ESPÈCIA DE PTEROSAURE A AUSTRÀLIA
De paleontològs australians descobriguèron los fossils d’una nòva espècia de pterosaure desconeguda fins a uèi lo jorn. Lo pterosaure foguèt un anhanguerian que visquèt fa mai de 100 milions d’ans e foguèt nomenat Haliskia peterseni. Lo pterosaure demorèt en çò qu’uèi es Queensland, lo nòrd australian, pendent lo Cretacèu.
Los cercaires soslinhèron que foguèt un pterosaure plan singular, amb una cresta al bèc e dents plan ponchudas. La sieuna envergadura alara foguèt estimada en 4,6 mètres. “Haliskia peterseni foguèt un òrre predator que visquèt fa 100 milions d’ans a Queensland. La majoritat de Quensland alara èra enfonzat jos la mar », çò diguèt Adele Pentland, de l’Universitat de Curtin.
Un pterosaure plan conservat
Las rèstas fossilas d’Haliskia peterseni foguèron trobadas per Kevin Petersen en novembre de 2021 a la Formacion de Toolebuc, al bacin d’Eromanga. « Malgrat que sonque son un 22% dels corps de l’animal, son de fossils plan melhor conservats que los de l’unic autre pterosaure jamai trobat en Austràlia, çò diguèt Pentland. I avián las maissas, de dents, de vertebras, d’osses de l’ala e part d’una pauta ».
“Tanben foguèron trobats d’osses de la gorja, plan delicats e que demòstran qu’aviá de muscles de la lenga plan poderoses qu’ajudavan lo pterosaure a pescar de peissum e de cefalopòds a la mar, çò contunhèt la scientifica. En mai d’aquò, los cercaires identifiquèron lo nòu pterosaure coma apertenent a l’òrdre dels Anhangueria, un grop de pterosaures que visquèt per tota la planeta, tanben a Brasil, Anglatèrra, China, l’estat espanhòl e Estats Units.
“Sospecham que los pterosaures anhanguerians capitèron plan a tota la planeta pr’amor de la sieuna fisiologia. Mas ara cal analisar aquela ipotèsi e veire se aquò foguèt real o pas, çò apondèron los paleontològs australians ». La descobèrta foguèt publicada al numeric Scientific Reports.
La Redaccion
Fotografia principala: Gabriel Ugueto
