A estat ua mina de carbon indiana era qu’a balhat nòus fossils de primats e nòva lum sus era evolucion des primats. E poirie èster qu’aguest país avesse avut un ròtle cruciau ena evolucion d’aguesti animaus, entre es quaus mos trapem es òmes. Era descobèrta ja a estat publicada en eth jornau electronic Journal of Human Evolution.
Es fossils trapadi son 25 uassi de braç, pauta, maluc e pè, qu’an ua edat d’aperaquí 54,5 milions d’ans e que placen Índia coma un lòc clau ena evolucion des primats. Atau o a ditz Rachel Dunn, biològa dera Universitat Des Moines d’Iowa, en America. Es uassi an estats trapadi en ua mina de carbon en Gujarat, en er oèst deth país-continent e poirie èster que siguessen fossils de primats fòrça semblants as des primats que visqueren hè 65 milions d’ans, quan era evolucion des primats comencèc.
“Aguesti fossils, aperats fossils de Vastan mos balhen ua aproximacion ar ancessor comun des primats d’ua manèra fòrça mes precisa que non d’autes fòssils – çò diguec Kenneth Rose, paleontològ dera Escòla Universitària de Medecina Johns Hopkins e coautor der estudi -. Índia siguec un centre clau en eth desvolopament dera evolucion des primats en ua epòca ena quau ère ua isla isolada deth continent”.
Uns animaus fòrça petits
Es fossils ara trapats apartien a un animal qu’a ues mesures d’un lemur gris rat o un lemur nan, que pesaven entre 150 e 300 grams e que son estats hèt publics a travèrs de Morphosovice.org entar estudi de toti. Era sua abilitat per pujar as arbes totun ère limitada. E poirien èster es ancessors des dus grops de primats (tarsèrs, monards e simis) e es adapoids (familha des lèmurs, loris e galagi).
Segon era equipa qu’a hèt eth nòu estudi, èren ath sòn torn arrèhilhs d’un ancessor comun de toti aquesti grops de primats en ua epòca ena quau Índia marchaue en direccion nòrd entà Asia. E aquí aurien evolucionat lentament amb de caracteristiques fòrça primàries.
Atau, ua possibilitat sèrie que toti es primats e sons arrèhilhs evolucionèren isoladi en eth continent –isla d’Índia entre ara hè 65 e 55 milions d’ans. Aguesta ei era tesi defenuda per Doug Boyer, dera Universitat Duke, antropològ, qu’a trabalhat en aguest estudi.
Mès pas toti es scientifics i son d’acòrd. Bèri uns pensen aué qu’era origina des primats ei China e pas Índia. Mès en China s’an podut trapar encara primats Omomiids. Es fossils de Vastan balhen donques mes lum ara malaisida cadena evolutiva des primats. Era discussion scientifica ei tostemps bona.
Christian Andreu
